Alvaro Videgain Tubacex enpresako zuzendariak hedabideen aurrean azaldu zuen zergatik irekiko duten Kantabrian lantegi berria. Erabaki hori EAEko lan kostuak “handiegiak” direlaren baieztapenarekin lotu zuen zuzendariak. Horregatik, langileen soldatak “malgutu” behar direla esan zuen hilaren hasieran, Austrian eta Estatu Batuetan askoz gutxiago ordaintzen baitiete langileei. Horren guztiaren ardura lan ereduari leporatu dio Tubacexek eta bereziki aipatu du sindikatuen jarduera.
Enpresaren zuzendariaren ustez lan gatazka gutxiago behar dira, sindikatuek politizatzen baitituzte. Erkidegoak zerga gutxiago ere ezarri beharko lituzkeela aipatu zuen enpresariak. Guztira 411,97 milioi eurotan baloratutako salmentak egin ditu Tubacexek urteko lehen bederatzi hilabeteetan, enpresak kaleratutako datuen arabera. 11,85 milioi euroko irabazi garbiak lortu ditu horrela.
Zuzendaritza goreneko kideek %12 igo zuten iaz euren soldata. Hala, kide bakoitza 225.500 euro jasotzera iristen da urtero. Hau da, enpresako pertsonalaren %0,75a izanik, lan kostuaren %4,55 hartzen dute.
“Lantegia Kantabriara eramatea ez da erabaki estrategikoa, politikoa baizik”. Hala uste du Aiaraldeko LABek. Sindikatuko kideek ez dute begi onez ikusten “inbertsioak eskualdetik eta erkidegotik kanporatzea”, eta “patronalaren bozeramaile papera” hartu izana egotzi diote Videgaini. ELAk, aldiz, lan kostu altuak dituzten Europako herrialdeetan langabezi gutxiago dagoela argudiatu du, Tubacex irabazi handiak dituela gaineratzearekin batera.
Laudioko udal-gobernuak, bere aldetik, erabakiaren berri Kantabriako komunikabide baten bidez jaso zuela salatu zuen, Arabako Diputazioak “hilabete batzuetako aurrerapenarekin” jakin zuen bitartean.
Erabakiaren berri izan bezain laster, Amurrio, Artziniega eta Laudioko udalek premiazko bilera bat egiteko eskatu zioten enpresako zuzendaritzari, baina oraindik ez dute erantzunik jaso. Aiaraldea.com-ek ere ahaleginak egin ditu enpresaren iritzia jasotzeko baina momentua aproposa ez delakoan uko egin dio hitz egiteari. Hala ere, azaroaren hasieran Videgainek azpimarratu zuen Aiaraldean dauden lantegietan apustua egiten jarraitzen duela. Azken urtetan egindako inbertsioak horren adierazle dira. 2010ean, adibidez, laminazio-hotz bidez tutuak eraikitzeko sistema jarri zuen Amurrion.
Marina de Cudeyoko (Kantabria)lantegi berria 2014rako irekitzea dago aurreikusia, eta filialaren akzioen %19a Kantabriako Sodercam sozietate publikoak erosiko lituzke.