Joan den maiatzaren 30ean greba orokorra burutu zen Hego Euskal Herrian, eskubide sozialen eredu propioa aldarrikatzeko. Aiaraldean ere atxikimendu sozial, komertzial eta laboral handia izan zuen.
Aiaraldea Planto Greba plataformak jakinarazi duenez, eskualdeko gazte bati 100 euroko isuna jarri dio poliziak kutxa automatiko batean pegatina bat itsasteagatik, pikete informatiboak lanean ari ziren bitartean. Banketxeak salaketarik jarri duen edo ez, ez dakitela nabarmendu dute.
Horregatik, plataformak berriz ere poliziaren jokaera eta intentzioak agerian geratu direla adierazi du, behin eta berriz eskubide sozialen borroka indargabetu nahian. Haien ustez, larriena gazteekiko duten jokaera da, hauek izaten baitira euren helburua, hauek ahultzeko eta batez ere borroka kriminalizatzeko asmotan. Poliziaren helburua argia dela esan dute: murrizketak eta eskubideen galeraren kontrako mobilizazioak etetea.
Honekin batera, Aiaraldeko Plataformak gizartea animatu du borroka honetan jarraitzeko, eskubideak defendatzen jarraituz eta probokazio horiek alde batera utziz. Horregatik, gazteari elkartasuna adierazi eta gauza bera egiteko gonbitea luzatu dio jendarteari. Gaztearen isuna denon artean ordaintzeko pegatinak salduko dira 50 zentimotan. Azkenik, Aiaraldeak plantoa nahi duela aldarrikatzen jarraituko duela adierazi du plataformak.