Auzitegi Nazionalak bihar onartu lezake Parot Doktrina medio espetxean dauden Manu Gonzalez eta beste 8 presoren askatasuna. Senide eta lagunek baieztatu dutenez, Gonzalez "laister" askatuko duten presoen zerredan dago. Izan ere, fiskalak dagoeneko argi berdea eman dio preso laudioarraren kaleratzeari. La Razon hedabidearen arabera Auzitegi Nazionalean aztertutako 17 kasuen artean 9 dira euskal herritarrak. Horietatik hiru, gaur askatu dituzte. Aiaraldea.com-ek jakin duenez, senide eta lagunak Sevillarantz abiatu dira. Gonzalezek 24 urte eman ditu preso. Egun, Sevilla II espetxean dago. Duela hiru aste bertako euskal preso politikoek gose grebari ekin zioten, dagozkien eskubideak ukatzen zaizkielako. Larunbatean elkartasun martxa egin zuten eskualdetik eta Euskal Herritik bertara. Gaur 23.eguna dute gosegreban.
Santos eta Biguri, zain
Santos Berganza eta Jose Anjel Biguri preso aiaraldearrek ere, Estrasburgoko auzitegiak parot doktrina deuseztatzeko aginduaren ostean, aske behar lukete. Bi kasuak, ordea, Auzitegi Konstituzionalean daude baina gaur adieraziko dute zein epaitegietatik bideratuko dituzten hemendik aurrera. Senideen arabera, litekeena da Auzitegi Nazionalaren esku uztea, dagoeneko fiskalari informe ezberdinak eskatu baitizkiote.
Familiakoen ustez, Santosi buruzko txostena jadanik fiskalak auzitegi nazionalari igorri egin dio, "baina ez da ziurra". Biguri askatzeko baimenaren egoeraz ez dute nobedade berririk: "Bi kasuetan Auzitegi Konstituzionalaren zain daude, Audientzia Nazionalera pasatuko direnedo ez erabakitzeko". Epaitegiz aldatzen bada, haien kasuak mahaigainean izatera itxaron beharko dute.