Albistea “kantabriako prentsaren bidez” jaso dutela salatu du Natxo Urkixo alkateak, aldundiak hilabete batzuetako aurrerapenarekin zekien bitartean
Tubacex enpresaren deslokalizazioaren aurrean Arabako Foru Aldundiak izan duen jarrera salatu du Laudioko udal-gobernu taldeak. Tubacex-ek Kantabriako Marina de Cudeyo herrian filial bat irekiko zuela iragarri zuen hilaren hasieran. Filial hori Tubacex Services deituko litzateke, eta datorren urterako funtzionamenduan egotea dago aurreikusia. Kantabriako fabrika horrek Tubacex-ek orain arte eskaini ez dituen material batzuk ekoiztea izango luke xede.
Horren harira, Tubacexen erabakiaren berri aurretik jaso zuen galdetu zion EH Bilduk Jose Zubita diputatuari, erregimen foral eta sustapen ekonomikoko batzordean. Natxo Urkixo Laudioko alkatea ez zen bilera horretan egon, baina bertan Zubitak esandakoaren audioa entzuteko aukera izan du. Alkatearen hitzetan, diputatuak bere egiten ditu enpresak fabrika berria Aiaraldetik kanpo muntatzeko erabilitako arrazoiak: eskualdeko soldata kostua “altuegia” dela, “sindikatuekin akordioak egiteko zailtasunak” daudela eta, oro har, lan gatazka giro handia dagoela. Hortaz gain, Urkixok aipatu du “bitxia” iruditzen zaioa diputatua etengabe Laudio aipatzen aritzea, Tubacexek Amurrion eta Artziniegan ere lantegiak dituelako. Hortaz gain, Zubitak arazoa Laudioko udalari dagokiola esan izana salatu du alkateak. “Nik uste dut bera -Zubita- dela sutapen ekonomikoaren probintzia mailako arduradun nagusia”.
Bileraren zain
Laudioko alkateak gaineratu du Tubacexen lantegiak dituzten hiru herrietako -Laudio, Amurrio eta Artziniegako- udal gobernu taldeek enpresari “premiazko bilera bat” egiteko eskatu ziotela albistea jaso bezain laster, baina enpresaren partez oraindik ez dutela erantzunik jaso.
Zubita, aldiz, hainbat hilabetetako aurrerapenarekin izan zuen enpresaren asmoen berriz, eta Tubacexekin biltzera eta lantegiak bisitatzera iritsi zen, Urkixoren arabera. Gauzak hala, hilabete hauetan zehar udalei ezer ez jakinarazi izana egotzi dio alkateak diputatuari.