Alvaro Videgain Tubacex enpresako presidenteak soldaten kostuak murriztearen alde agertu zen herenegun Bilbon egindako agerraldi publikoan. Soldadurarik gabeko altzairu herdoilgaitzeko hodi ekoizpenean munduan bigarren enpresako jabeak, adierazpen hauek egin zituen Iberdrola, Telefonica edota Tecnalia enpresetako buruekin batera eginiko Lehiakortasunerako Enpresa Kontseiluan.
Besteak beste, soldata kostuak talde industrialak Austrian duen lantegian Aiaraldean dituenetan baino %15 merkeago direla nabarmendu zuen enpresaburuak. Hori dela eta “soldaten malgutzea” beharrezkotzat jo zuen enpresariak, bere aburuz lan eredua “zurrunegia” delako.
Neurriko kostuak eskatu zizkion gobernuari, izan ere Videgainen aburuz “elektrizitatearen tarifak, gasolinarenarekin antz handia du, erdia baino gehiago zergek osatzen baitute” neurri horiek “lehikortasuna mugatzen dutela” deitoratu zuen.
Kantabrian eginiko inbertsioa kontestutik at
Azken egunotan ika-mika handia izan da enpresak Marina de Cudeyon erositako lur sailen harira, Tubacexeko presidenteak “operazioaren nondik norakoak kontestutik atera direla” azpimarratu du.
Momentuan eginiko kanpo inbertsioi esker egun enpresak aiaraldean jarraitzen duela gaineratu du eta enpresak mundu osoan presentzia handia duela gogorarazi du. Honekin batera, Kantabrian irekiko duten lantegiak “hodiak amaitzeko neurriko inbertsioa” izan dela azpimarratu du.
Etekin handiak
Azken urteotako krisialdia izanagatik ere, hodi herdoilgaitzen enpresak mozkin handiak izan ditu azken urtean.
Izan ere, urteko lehen hiruhilabetekoan 3,53 milioi euro irabazi zituen, aurreko urtearekin alderatuta dexente handiagoa. Irailera bitarte, enpresa aiaraldearrak 11,85 milioi euroko irabaziak metatu ditu; aurreko urteko epe berarekin alderatuta %26,5 gehiago alegia.