“Neguko antzerkia” programa jarri du martxan Arabako Foru Aldundiak, eta Aiaraldean ere izango du eragina. Hiru izango baitira programa horren baitan eskualdean egingo diren ekimenak.
Lehen zita Artziniegan izango da, Pez Limboren eskutik. Antzerki talde horrek Espinazo o callos antzezlana aurkeztuko du museo etnografikoan, azaroaren 5ean. Egun horretan antzezlana lau aldiz eskainiko da: 12:00etan, 18:00etan, 19:00etan eta 20:00etan. Obrak humore garratza jorratzen du, eta hainbat sari jaso ditu, Logroñoko Teatro con diamante lehiaketan esaterako. Gainera, antolatzaileek jakinarazi dute obra adin guztiko pertsonei zuzendua dagoela.
Bigarren zita Amurrion izango da, azaroaren 5etik 17ra bitartean. Egun horietan zehar Ipuin txotxongiloen erakusketa egongo da La casona aretoan, Panta Rhei taldearen eskutik. Hortaz gain, azaroaren 10ean dramatizazio saioak egingo dira, familia osoari zuzenduak, euskaraz. Bi saio egingo dira, bata 10:00etan eta bestea 11.15etan, eta bakoitzak 45 minutuko iraupena izango du.
Neguko antzerkiak Aiaraldean izango duen azken zita Laudion izango da, azaroaren 21ean, Kultur Etxean. Kike Loyolak Humor en serio ikuskizuna eskainiko du, 19:30etan. Azken antzezlan hori helduei zuzendua dago.