1989ko irailean atxilotu zituzten Manu Gonzalez eta Julen Fernandez laudiarrak, Santos Berganza amurrioarra eta Jose Angel Biguri mengaraiarra. Orduz geroztik daude espetxeratuak.
Presoen senideek azaldu dute lau preso horietako hiruri ezarri zaiela ofizialki 197/2006 doktrina (Parot doktrina bezala ezagutzen dena). Doktrina horren aplikazioak espetxe zigorrak hamar urte gehiago luzatzea ekarri du, “20 urtetik 30 urtera”, senideek salatu dutenez. Lau presoek kondenaren hiru laurdenak beteta dituztela ere gogorarazi dute, Jose Angel biguri “larriki gaixorik” dagoela azpimarratzearekin batera.
Egitaraua
Horregatik, irailaren 21ean mobilizatzeko deia zabaldu du Herrirak, eta egun osoko egitaraua antolatu du horretarako, “24 urte, nahikoa da!” lemapean. 10:30etan emango zaio hasiera egunari, Amurrioko plazan. Bertatik abiatuta oinez “eskualdeko zenbait herritako kaleak zeharkatzea” da asmoa. Laudioko Institutoan bukatuko da martxa, eta bertan egingo da herri bazkaria. Bertso saioa egongo da ondoren, eta arratsaldeko zazpietan emango zaio bukaera egitarauari, herriko kaleetan zehar egongo den manifestazioarekin.
Mobilizazioaren helburua lau presoen “eskubideak aitortzea eta berehalako askatzea eskatzea” da. Horrela, larunbatean “kalera irteteko deia” luzatu die Herrirak Aiaraldeko herritarrei, “guztion ahotsa batuz eskubide urraketa honen erantzuleei interpelatzeko”.