Naturayala blogak eskualdeko hegaztien inguruko artikulu interesgarria idatzi du. Gustavo Abascal da egilea:
"2003an Gorobel edo Salbada Mendilerroa Hegaztientzako Babes Bereziko Eremu (HBBE) izendatu zuten, Europa mailan nahiz EAEn biodibertsitatea babesteko habitat interesgarriak barne hartzen dituelako, hala nola baso autoktonoak, larreak, bazkalekuak, leizeak eta ur gozoko eremuak. 3.883 hektarea ditu Aiaran, Amurrion eta Uduñan banatuta.
Gorobel Mendilerroko HBBEaren barruan kudeatzen diren edo erabakigarriak diren elementuen artean, azpimarratzekoak dira hegazti nekrofagoak edota habitat harkaiztarretako hegaztiak.
Uztailean pare bat aldiz egin nuen Urduñako Porduta-Txolope ibilaldia. Gorobelen hegazti harkaiztarrak behatzeko dagoen tokirik onenetako bat dago, hau da, leku bikaina da mendi honetakoak bezala amilburuetan babeslekua edo habiak egiteko tokia aurkitzen duten hegaztiak ikusteko.
Ebakian aurrera egin ahala, hegazti horietako asko agertzen dira: sai arrea, sai zuria, belatz gorria, belatz handia, belatxinga mokogorria, belatxinga mokohoria, belea, haitz-enara, enara azpizuria, sorbeltz arrunta, malkar-sorbeltza, buztangorri iluna, harkaitz-zozo gorria, mendi-tuntuna... Neguko hilabeteetan harkaitz-txoria ere ikusi ahal izan da.
Baina hegazti horiek ez daude bakarrik, gizakiaren presio handia jasaten duen toki bat da eta: mendizaleak, eskalatzaileak, parapenteak, globo aerostatikoak, ala delta motordunak eta multikoptero bat ere ikusi ahal izan dira mendilerro honetan. Hegazti hauen dibertsitate aberatsa babesteko gai izango al gara Gorobel HBBE eremu izendatu izanak exijitzen duen bezala?
Argazkiak uztailean hartu dira HBBEan-Gorobel Mendilerroan."