EH Kirolak idatzitako kronika eta argazkiak:
Joseba Urbano gizonezkoetan eta Inma Ruiz emakumezkoetan izan ziren azkarrenak Bilbotik Laudiorako bidea egiten
250tik gora gizon eta emakume bildu ziren goizeko 9etan Bilboko Arriagan, Burdin Hesiaren ibilbidea jarraituz, Laudiorainoko bidea egiteko. 25 km-ko mendi arteko bidea izan zuten aurretik, Pagasarri, Ganekogorta eta Goikogabe bezalako tontorretatik igaroz.
Azkarrenak, Joseba Urbano eta Javi Olabarria izan ziren, lehen eta bigarren postuetan hurrenez hurren. 2 ordu eta 17 minutu behar izan zituzten ibilbidea osatzeko. Irudi polit bat oparitu zieten Laudioko Lamuza parkera bertaratutakoei helmugako marra eskua emanda zeharkatu zutenean. Haien atzetik iritsi zen Iñaki Isasi 3. sailkatua.
Emakumezkoetan, Inma Ruiz izan zen 25 km-ak burutzen lehena, eta Mari Carmen Gartzia eta Loli Benitez 2 eta 3. postuak.
Beteranoen kategorian, Jesus Mari Perurena eta Mari Carmen San Juan izan ziren azkarrenak.
Amets Meaza Laudioko kirol zinegotziaren eta Ane Fernandez Euskal Herria Kirolako teknikariaren eskutik jaso zitutzen sariak irabazleek. Txapelak Ruiz eta Urbanorentzat, eta kopak gainontzekoentzat. Guztiek jaso zuten, halaber, Euskal Herriako Selekzioko kamixeta ofiziala (irudian ikusgai).
EH Kirola eta Euskarri Kirol Elkarteetatik oso pozik agertu dira Burdin Hesiaren lehen edizio honek izan duen harrerarekin, eta datorren urteari begira jarri dira dagoeneko. Gogora dezagun, 2014ean norabidea aldatu eta Laudiotik Bilbora izango dela Lasterketa.