Gaur argitaratuko da Aiaraldea Egunkariaren urteko azken zenbakia. Zenbaki berezia izango da, ez duelako, ohikoan bezala, 16 orri izango. Egunkari bikoitza izango da, 32 orrikoa. Ohiko atalez gain, gehigarri berezi bat izango du baita, Gabonei buruzkoa. Eskualdeko hainbat saltokiri eginiko elkarrizketak, gabonetarako errezetak, iritzi zutabeak edota hainbat gairi buruzko artikuluak barnebilduko ditu gehigarri horrek.
Gai ugari
Ohiko egunkariak, bere aldetik, hainbat gai izango ditu hizpide. Sozioekonomia atalean Juanjo Basterra izango da protagonista. Amiantoaren inguruan argitaratu berri duen liburuaz mintzatuko da kazetari aretarra.
Aniztasun funtzionala eta sexualitatea jorratuko ditu Jendartea atalak, Iñigo Martinez Sagastizabalen eskutik. Kultura atalean, Artziniegan 1682an egondako prokuradore euskaldunaren istorioa ekarriko du gogora Xabi Zalbide Etxeberriak. Kirolean, aldiz, Richis Omoruyi saskibaloi jokalari amurrioarra izango da protagonista, Euskadiko Selezioarekin aritzeko hautatu dute eta.
Amaitzeko, Jurgi Ibarretxe Jimenez musikariari eginiko elkarrizketa topatu ahal izango du irakurleak kontrazalean.
Julen Arzuaga, Iñaki Urkixo, Koldo Gilsanz, Luis Vil, Aketza Merino eta Asier Rubio arduratu dira iritzi zutabeak idazteaz, Edorta Moreno “Txed” komikia marrazteaz eta Eneritz Ugarriza horoskopoa egiteaz.