Bihar argitaratuko da Aiaraldea Egunkariaren 60. zenbakia. Euskararen Egunari begira eginiko egunkaria izango da gehienbat, erreportaje nagusia horri buruzkoa izango baita. Abenduaren 3an Euskalgintza Kontseiluak Amurrion egingo duen ekimen bateratuari buruzko xehetasun guztiak topatu ahal izango ditu irakurleak bertan.
Baina egongo dira baita bestelako eduki batzuk ere. Sozioekonomia atalean Amurrio Bidean izango da protagonista, bihar ospatuko baitu garapenerako elkarte horrek bere 10. urteurrena.
Kultura eta kirola
Kulturan, berriz, Durangoko Azokari buruzko informazioa izango da nagusi, ugariak baitira bertan parte hartuko duten sortzaile aiaraldearrak. Kirolean, berriz, Maialen Solaun Pikaza izango da protagonista, Espainiako Selekzioarekin aritzeko hautatu berri duten goalball jokalaria.
Kontrazalean, berriz, Ruben Gonzalez Diego tatuatzaileari eginiko elkarrizketa topatu ahal izango da.
Egunkari honetan Txema Urkijo, Raul Arza, Inma Roiz eta Irati Marañon arduratu dira iritzi-zutabeak egiteaz eta Gorka Belasko, berriz, komikia marrazteaz.