Fracking Ez Aiaraldea plataformak hitzaldia egingo du bihar 19:00etan Orozkoko Kultura Etxean. Deialdiaren bitartez plataformaren asmoa da Orozkoko herritarrei adieraztea SAIA baimenak jasotzen dituen ikerketa sismikoak aurki hasiko direla.
Rakel Salazarrek azaldu zuen SAIA baimenak, berez, gas arrunta ustiatzeko ikerketak egiteko balio duela. Hala ere, SHESA enpresak berak jasotzen du bere txostenean 60. eta 70. hamarkadetan egindako ikerketak askoz zabalagoak izan zirela eta horrek plataformaren susmoak piztu ditu. Fracking Ez Aiaraldea plataformaren iritziz egingo diren frogak haustura hidraulikoa praktikatzeko bideratuko direla. "Lehenago egindako ikerketak hastera daudenak baino zehatzagoak baziren, eta emaitzek guztiz baztertzen bazuten gas arrunta ustiatzeko aukera, zertarako balioko dute bidean daudenak?" esan zuen Iñigo Ibarrak.
Taldearen aurkezpena
Haustura hidraulikoaren aurka dagoen kolektiboak atzo aurkeztu zituen etorkizunerako prestatu dituzten jarduerak -San Isidro Azokan informazioa banatzea, besteak beste- eta orain arte egindako ibilbidea.
Taldearen bozaremaileek azpimarratu zuten egin nahi duten lana bereziki informatiboa dela. Iera Garaiok adierazi zuen proiektua ez dela batere gardena eta kaltetuak izan daitezkeen udalek ere ez dutela informazio askorik. Zentzu horretan, plataformako kideek esan zuten taldearen lana dela hutsune hori betetzea.
UAGA sindikatua
Prentsaurrekoan UAGA sindikatuaren lehendakariak ere parte hartu zuen eta landa eremuan Fracking-ak eragin ditzakeen kalteei buruz hitz egin zuen. Jose Antonio Gorbearen ustez haustura hidarulikoak nekazari eta abeltzainen etorkizuna are gehiago jarriko luke kolokan.