Hekimen, Herri ekimeneko euskal hedabideen elkarteak elkartasuna adierazi dio Lander Arbelaitz "Argia" aldizkariko kazetariari Donostiako 6 gazte auzipetu atxilotzeko "Aske Gunea" hustutzeko operazioaren barruan jasotako tratua dela eta. Kazetariek nahi duten ikuspuntutik informatzeko daukaten eskubidea aldarrikatu du elkarteak. Hekimen elkartearen barruan dago, besteak beste, Aiaraldea Komunikazio Leihoa.
Azaldu dutenez, Hekimeneko kide sortzaileetako bat da Argia aldizkaria, eta Hekimenen helburuetako bat da euskal hedabideen presentzia eta eragina handitzea gizartean. Horretarako, ezinbestekoa da gero eta informazio kalitatezkoagoa eskaintzea. Hekimenen ustez, Lander Arbelaitz informazio zuzena
emateko ahalegin betean ari zen Ertzaintzak, eskuan zeukan akreditazioa kontuan hartu gabe, lurrera bota, astindua eman eta bertatik atera zuenean.
Hekimenek, gainera, guztiz ezegokitzat jotzen du Ertzaintzako buruek hartu zuten erabakia kazetariak gune itxi eta bereizi batean zedarritzeko. "Kazetarien oinarrizko eskubideetako bat da informazioa ahal bezain hurbilen eta, batez ere, nahi duten ikuspuntutik eman ahal izatea. Hori da kazetaritza. Hori da gure lana".
Sarean zabaldutako bideo batean agerian geratzen denez, Ertzaintzak Lander Arbelaitz Argia-ko kazetaria kolpatu eta mehatxatu zuen Aske Gunean lanean ari zela esan eta akreditazioa erakutsi arren.
Ia hiru ordu behar izan zituzten Aske Gunean antolaturiko herri harresia gainditu eta gazteak atxilotzeko. Kartzela zigorra ezagutzera eman zenetik, Aske Gunea antolatu zuten Bulebarrean elkartasun eta salaketa ekimen gisa.
[video:http://www.youtube.com/watch?feature=player_embedded&v=FxLzihTbT5Q]