Martxoaren 15ean elkartu zen bigarren aldiz Aiaraldea Komunikazio Leihoak sortutako Instituzioen Kontseilua. Helburu bikoitza du. Batetik, Aiaraldea Komunikazio Leihoa elkartearen berri ematea eta alderdi politiko zein instituzioen ekarpenak jasotzea. Eta, bestetik, euskararen normalizaziorantz urratsak ematea. Iazko apirilaren 17an Saraubeko mahaian egindako agerrialdia du abiapuntu Instituzioen Kontseiluak. Bertan, eskualdeko alkate guztiek, alderdi politiko guztietako ordezkariek eta euskara teknikariek hartzen dute parte.
Ondorioz, kontseiluaren osaketa oso anitza izan zen eta herri guztien ordezkariak agertu ziren. ADIEk, Omniak, Bilduk, EAJk eta PPk ordezkariak bidali baizituzten. Horretaz gain, Amurrioko, Laudioko, Orozko eta Arrankudiagako, Arakaldoko, Aiarako zein Urduñako euskara teknikariak ere bertaratu ziren. Alkateei dagokienez Arakaldokoa izan ezik gainontzeko herri guztietakoak azaldu ziren: Itziar Duoandikoetxea (Arrankudiaga-Zollo), Natxo Urkixo (Laudio), Josu San Pedro (Orozko), Josune Irabien (Amurrio), Karlos Arranz (Urduña), Agurtzane Llano (Artziniega), Sergio Tato (Okondo) eta Josu Artetxe (Aiara).
Edukien aldetik, elkarteak 2012ko balantze ekonomikoa eta 2013ko plangintza aurkeztu zuen. Alabaina, ez zen transmisiorako bilera soila izan, instituzioetako langileek iradokizunak eta kezkak plazaratu baizituzten. Besteak beste, eskualde naturalaren kontzeptua indartzeko beharra adierazi zuten batzuk.
Hausnarketen emaitza
Herri eta ideologia ezberdinetako ordezkariak taldeka batu ziren ondoren. Hala, euskararen normalizaziorantz komunikabideek, instituzioek zein euskalgintzak eman beharreko pausoez eztabaidatzen aritu ziren. Emaitza, instituzio eta alderdi politikoek euskarazko komunikazioa sustatzeko protokolo bat osatzearen ideia izan zen. Erakundeen webguneen hasierako orriak euskaraz jartzea, prentsa oharrak elebitan helaraztea, udalbatzak itzultzaile zerbitzua eskainiz euskaraz egitea... proposatu eta adostu zen. Datorren urteari begira, beraz, litekeena da euskarazko komunikazioan instituzioek elkarlanean urrats berriak ematea.