Frackingak bere lehenengo urratsak Aiaraldean emango ditu. Edo hori izan da PSEren asmoa Eusko Jaurlaritza utzi baino lehen. Asteartean, Gobernu Kontseiluak erabaki zuen Aiaraldean eta Bilbo inguruan ematea Frackingaren teknikaren bitartez gasa ustiatzeko baimenak.
PSEk adierazi du hauek ez direla esplotatzeko baimenak, gasa bilatzeko sundaketak baizik. Hala ere, Fracking teknika erabiliko du Shesak enpresa publiko-pribatuak. Printzipioz, hedabideek iragarritakoaren arabera Aiara eta Laudio izango dira udalerri kaltetuak.
Sozialisten kontraesanak
Egun gutxi falta direnean Patxi Lópezek Ajuria Enea uzteko, PSEk bultzada erabakigarria eman dio Frackingaren proiektuari. Euskal Sozialisten jarrera deigarria da, batik-bat aintzat hartzen bada Kantabria eta Aragoiko alderdikide sozialistek, besteak beste, proiektu honen aurka egin dutela.
Bestalde, EAEn, beste lekutan ez bezala, ustiapena egin behar duen enpresak kapital publikoak zein pribatuak osatzen du. Beraz, erakunde sustatzailea eta baimena ematen duena berbera da.
Proiektu gatazkatsua
Urrian milaka pertsonek Gasteizen protesta egin zuten Frackingaren aurka, antolatzaileen ustez 10.000 manifestari baino gehiago elkartu ziren Arabako hiriburuan. Aiaraldean hitzaldi ugari eman dituzte ustiapen teknikaren aurkariek, Eusko Jaurlaritzak ez baitu argitu zertan datza.
Aurkarien aburuz, Frackingak, besteak beste, lur azpiko urak kutsatzeko arrisku larrian jartzen ditu. Bestalde, udalerri batzuk, Amurrio bezala, Frackingaren aurkako mozioak onartu dituzte.