Norman Mailer Estatu Batuetako intelektual nahiko famatua da. Gizon honek idatzi dituen hainbat izenburu politika ardatz moduan hartzen dute, baina badauka ere dibertigarria eta kafrea den eleberri bat. Eleberri hori "Los tipos duros no bailan" da.
Droga, sexua eta desfase ugari agertzen da kutsu beltz duen liburu honetan. Hasierako orrialdeak epaitzen baditugu, hala ere, ez dirudi eleberri bereziki entretenigarria denik. Protagonista ohetik jaikitzen da pasarte hauetan, sekulako pixamonarekin. Bere etxetik paseatzen da eta gogoratzen du duela egun asko bere emazteak utzi zuela. Edatea eta drogak hartzea izan da aurkitu duen ihesbidea bere egoera pertsonalari aurre egiteko.
Eta noski, parranda bikaina bota zuen aurreko egunean eta, horren ostean ez ditu gauza gehiegi gogoratzen. Beraz, bere besoan tatuai bat ikusten duenean harrituta geratuko da. Harridura hori gero eta handiago izango da kotxean odol pilo bat aurkitzen duenean.
Dena den, tipo honek buruko min handia dauka eta nahiago du gehiegi ez pentsatzea. Horren ordez, mendira joango da bere marihuanaren bila. Ekaitz bortitz bat erortzen ari zen bitartean jaso zuen bere landaketa eta auskalo horregatik den edo ez, baina eragin oso indartsua dauka marihuana horrek. Hori dela eta "deabruaren belarra" deitzen dio pertsonaiak. Eta ondo ezkutatuta dauka bere belar maltzurra, zuhaitz batek daukan zuloan, hain zuzen ere.
Beraz, gizonak zuhaitz honetan sartuko du eskua eta bere marihuana poltsaren alboan zerbait gehiago aurkituko du. Poltsa ireki eta gero, ikusiko du zer daukan barruan: beste pertsona baten burua. Beldurtuta, han bertan utziko du poltsa eta ospa egingo du korrika eta presaka, erabat izututa.
Ordu batzuk pasa eta gero, bere burua lasaitzea lortuko du, eta pentsatzen hasiko da. Berak utzi zuen hor gorpua? Beste norbait izan zen? Guzti hori jakiteko, lehendabizi, aurreko gauan egindakoa gogoratu beharko du. Eta berak bakarrik ezin duenez, apurka-apurka puzzlea osatuko du jendearekin hitz egiten.
Baina tamalez edo zorionez, bere herrian, Cape Cod-en, ero eta putaseme asko bizi dira eta, egia esanda, bera ere ez da aingeru bat. Hagatik, besteen gezur eta bere oroipenen artean bidaiatu beharko du. Bidai honetan, bortizkeria, toxikomaniak, desleialtasunak eta erokeri ugari gertatuko dira, irakurlearen mesederako. Zentzu batean, liburu hau eleberri beltz bat dela esan dezakegu, baina umore iluna, droga eta sexu asko daude eta leialtasunik ez. Gustoko badituzue osagai hauek istorio batean, hau da irakurri behar duzuen hurrengo liburua.