Durangoko azokan aurkeztuko dute lana, igandean
Mara-mara izeneko lana grabatu du Igor Arzuaga Aretako musikariak, Luis Vil amurrioarraren laguntzarekin. Arzuagak diskoa osatzen duten 12 kantuen melodia eta letrak sortu ditu, eta Vil moldaketa eta ekoizpenaz arduratu da. Hala, bi musikarien estilo pertsonalak fusionatu egiten dira diskoko kantetan. Arzuagaren piano eta akordeoiari Vilen perkusio eta gitarrak gehitzen baitzaizkio.
Gaztelupeko Hotsak zigiluarekin argitaratu dute Mara mara, eta igande honetan Durangoko azokan aurkeztuko dute, 14:30etan Ahotsenean.
Ibilbide luzeak
Bai Igor Arzuagak eta bai Luis Vilek musikaren munduan ibilbide luzeak egindakoak dira. Arzuaga pasaden mendean hasi zen Mikel Urdangarin eta antzeko artistekin grabatzen. Argi izpi bat eta Smog bakarkako lanak grabatu zituen gero, Gaztelupeko Hotsakekin. Ondoren, Mara izeneko proiektuan murgildu zen eta beste bi disko argitaratu zituen: Lagun eroa eta Unibertsoa gu. Bi lan horiek osatzeko pianoa eta ahotsa baino ez zituen erabili. Oraingo honetan, Politburo Recording Fiasco zigilua arduratu zen diskoen edizio eta banaketaz.
Luis Vil, aldiz, hainbat punk eta rock taldetan ibilitakoa da. Baina 2005etik aurrera bakarlari moduan aritu da, La mala crianza bandaren laguntzarekin. Lau izan dira horrela argitaratu dituen lanak: Versos Ajenos (Laudioko La Tetrada Literaria literatur taldeko kideen poesia musikatuen bilduma), Retrato del caos, Sapos y culebras eta Protopito. Azken hori pasaden ekainean argitaratu zuen.
Musikaren munduan ez-ezik, zinemagintzaren munduan ere sartua dago Vil. Hala, hasi zen Arzuagarekin elkarlanean. Aktore eta musikari lanak egiten izan baitzuen musikari aretarra Flores de papel filma laburrean.