Western generoaren barruan badaude izen oso ezagunak. Zuzendaritza aldetik, nahiz eta oso lan ezberdinak egin, John Ford, edo Sergio Leone aipatu ditzakegu, eta interpretazio lanak abiapuntutik hartuta, John Wayne edo James Stewart bururatuko zaizkigu. Hala ere, harribitxi ugari daude genero honen barruan -normala da, bestalde, ehunka filme interesgarri egin bait dira, hain famatuak ez direnik.
Hoien artean The Ox-Bow incident gogoratzeko beharrean gaude. Bere zuzendaria, William A. Wellman, baditu beste luzemetrai bikainak; The public enemy, adibidez, baina hau famatuagoa da. Hau guztia, eta Henry Fonda, Dana Andrews eta Anthony Queen filme honen aktore multzo barruan egoteak zailago egiten du pelikula honen ospe falta azaltzea edo ulertzea.
The Ox-Bow incident era oso sinple batean hasten da. Cowboy pare bat herri txiki batera heltzen dira. Hasierako minutu hauek ikusita komedia baten aurrean gaudela pentsa dezakegu, baina laster egoera gaiztotzen da. Herriko biztanle bat erasotua izan da. Bertako jendearen artean eztabaida pizten da: gaizkileen atzetik joatea edo sheriffa itxarotea dira aukerak. Batzuk ez daukate inolako dudarik, beraiek harrapatuko dituzte gaizkileak eta aurkitzen duten lehen zuhaitzean urkatuko dituzte.
Beste biztanle batzuk nahiago dute legearen erabilera, hau da, epaiketa bat. Badira ere bien artean mugitzen direnek, gauzak oso argi ez daukatenek. Dena den, gizon talde bat ateratzen da berehala errudunen atzetik. Hori bai, beraien artean, guztiek ez dute iritzi berbera. Beraz, hiru gizon aurkitzen dituztenean eta erasoa egozten dietenean, sekulako gatazka egongo da.
Honen bidez, The Ox-Bow incident-ek modu oso interesgarri batean lortzen du ikusleari pentsaraztea. Zer da justicia? Nola gauzatu era zuzen batean? Zer nolako zilegitasuna dauka heriotz zigorra? Guzti hori istorio entretenigarri, muturreko eta sutsu bati esker.