Filme asko oinarritu dira Philip K. Dick-en kontakizun edo eleberri ezberdinetan. Oso ospetsuak dira dagoeneko Blade Runner, Total Recall (Desafío total) edota Minority Report. Halere, badaude idazle estatubatuar honen ideiei esker jaio diren filme interesgarriak eta ez hain famatuak, adibidez, A Scanner Darkly. Oso luzemetrai bitxia. Gainera, bere dohainen artean, aipatu behar da nahiz eta bere pertsonai garrantzitsuenak Keanu Reeves, Robert Downey Jr. eta Winona Ryder-ek interpretatzen dituzten, ez ohizko filme hau animaziozkoa dela.
Aktore multzo hori antzematea oso erraza da, baina A Scanner Darkly-ren zuzendariak, Richard Linklater (Before the Sunset edo Fast Food Nation bereak dira ere), teknika digital arraro bat erabiltzen du -rotoskopikoa deitzen da, antza- kasu honetan. Honen bidez irudiak errealitatearen eta animazioaren artean mugitzen dira. Berez, luzemetraia guztiz digitala da, baina errealitatean grabatu diren sekuentzietan oinarritzen da.
Teknika honen bitartez emaitza onirikoak lortzen ditu zuzendariak eta itxura horrek bikain datorkio istorioari. A Scanner Darkly Philip K. Dick-en testu ezberdinetan errepikatzen diren gaiak lantzen ditu. Batipat, drogak, erokeria, harreman faltsuak edo alienatuak eta paranoia, botereak eragindako paranoia, hain zuzen ere.
Zentzu horretan, pelikula honek gonbidapen psikodeliko bat dirudi, ikuslea behin eta berriro galduta sentituko da seguraski, eta baliteke bukatu arte ez jakitea ze demontre den istorioaren mamia. Horregatik, edo nahiz eta horrela izan -bakoitzak erabaki ditzake bere arrazoiak- oso mistura erakargarria da A Scanner Darkly. Eta hoberena zera da, Dick-en liburuak ezagutzea ez dela beharrezkoa guztiz gozatzeko, hori bai, oso sarrera aproposa izan daiteke filmea egile honen eleberrietan sakontzeko.