Airez aldatzeko garaia dela aldarrikatu du Amurrioko Gazte Asanbladak. Hala, datorren larunbaterako gazte eguna antolatu du herrian, asanbladaren 4. urteurrena ospatzeko.
Goizeko hamaika eta erdietako txupinazoaren ostean herriko zein herritik kanpoko gazteek zer egin, ikusi, gozatu eta partekatu izango dute, egun osorako asanbladak antolatuak dituen ekintzei esker.
Goizean aizkolarien erakustaldia, boulderra eta umeentzako jolasak egongo dira, Uhinak Irratiaren emisioaren soinupean. Batukada kalejiraren ostean bazkari herrikoiari hasiera emango zaio, eta sabela bete ostean Deiedra taldearen folk doinuek alaituko dituzte Amurrioko bazterrak.
Arratsaldeko bostak aldera Okakukutzean jostatzeari ekingo diote gazteek. Apurtu arte eta Ametsgaizto taldeen kontzertuak entzuteko aukera egongo da gero, eta gaueko bederatziak aldera mani-kalejira burutuko da.
Ordu erdi bat geroago emango zaie hasiera gaueko kontzertuei. Zein da zein?, Demokrazia Zero, Irrintzi eta Dj Free Bere Akatz taldeak izango dira Amurrioko gazteek pentsatu, erabaki eta antolatutako egun honi behar bezalako amaiera emango dioten taldeak.