Dudarik gabe, Woody Allenek zinemari egin ahal zizkion ekarpen onenak dagoeneko egin ditu. Manhattan, Annie Hall edo Hannah eta bere arrebak kalitate handiko filmeak dira eta zinamagileak muga horiek nekez gaindi ditzake. Horrek ez du esan nahi egiten dituen filme berriak kaka hutsa direnik. Batzuk hobeagoak (Match point, Whatever works edo Scoop) eta beste batzuk okerragoak izango dira (Cassandra's dream, Vicky Cristina Barcelona) baina guzti guztiek zer edo zer interesgarria gordetzen dute. Badakigu ere interes hori agian soilik bere zaleek aurkitu dezaketela, baina ez dira gutxi munduan zehar.
Urtero proiektu berri bat aurkeztea ez da ahalegin makala eta aurten estreinatu duena, Conocerás al hombre de tus sueños, Allenen ohiko eskemak landu zituen. Bikoteak, krisiak, amodioak... Kasu honetan euren artean oso desberdinak diren pertsonaia batzuk dira protagonistak. Hasteko, ikusleak Helena ezagutzen du. Bere ezinean, emakume nagusi honek igarle baten atea jotzen du aholku bila. Psikologo asko ezagutu ostean bere dibortzioa gainditzeko duen azkenengo aukera da hau. Emakume honengana joatea bere alabaren ideia izan da, nahiz eta bere senarrak kontrako iritzia izan. Bestalde, gizon honek eta bere amaginarrebak oso harreman txarra dute. Tipoak, bere garaian, eleberri on bat idatzi zuen, baina arrakasta hori ez du berriro ere lortu eta horregatik bere emaztearen amaren dirua behar du ekonomikoki bizirauteko.
Emakume nagusi honen egoerak ez du zerikusirik bere senar ohiak egiten duen bizitzarekin. Nahiz eta adin berbera izan, Anthony Hopkinsen pertsonaia gazte baten moduan bizi da. Kirola egiten du eta emakume berriak ezagutzen saiatzen da. Gizon honen ikuspegi berria, gainera, pertsonaia guztien izaerak kutsatzen joango da. Bakoitza bere ametsen menpe eroriko da eta lilura honek gutxinaka harrapatuko ditu. Azkenean, sekulako aldaketak eragingo dituzte errealitatearen gordintasuna leuntzeko
Zentzu horretan, Woody Allenek filme honetan gaur egungo garaiaren inguruko gogoeta bat proposatzen du: mugarik gabeko garai arin baten ondorioak pertsonal mailan. Horretarako, ostia txar pixka bat eta aktore multzo on bat erabiltzen ditu: Naomi Watts, Josh Brolin edo Antonio Banderas (bai, honek ez du gaizki egiten, arraroa badirudi ere). Zuzendari amerikarraren aurkariek betiko arrazoiak aurkitu eta erabiliko dituzte; muturreko pertsonai burgesak edo umore oso berezia edo behin baino gehiagotan landutako gaiak. Bestalde, zaleek, itxaropen txikia jartzen badute izenburu berri honetan, dexente goza dezakete bai eta farre ilun batzuk bota ere