Nekez aurkitu dezake ikusleak filme erromantiko bat bere burua iraindu gabe. Genero hau ugari agertzen da zineman baina oparotasun horrek ez du sormen gaitasun handirik erakusten orokorrean. Zorionez, noizean behin produkzio independienteek bere txorakeriak alde batera usten dituzte eta filme bikainak eskaintzea lortzen dute. In Search of a Midnight Kiss adibide on bat da. Izenburu honen zuzendariak Woody Allen, Richard Linklater eta Kevin Smithen osagai ezberdinak hartzen ditu eta bere ekarpenak egin eta gero, betiko istorio erromantikoak hobetzen ditu, bide batez, ohiko kalitatea gainditzeko.
Horretarako, Alex Holdridgek Wilsonen istorioa kontatzen digu. Urte oso txar bat pasa eta gero -bere neskalagunak utzi zuen, bidai bat egin du arrakastaren bila eta oraindik ez ditu emaitzik lortu...- bere pisukide eta lagunak egoera oso oso deseroso batean harrapatzen du. Hobeagoa da ez jakitea zein den momentu hori gehiago gozatzeko. Apalkuntza hau sufritu eta gero, guztiak ondorio batera heltzen dira; bada Wilsonek bere bizitza pribatua birkopontzeko garaia. Gainera gabon zahar gaua berehala izango da. Etsituta, mutilak harremanetarako orrialde digital batean eskegitzen du hurrengo mezua; "misantropo batek beste misantropo bat ezagutu nahi du". Eta arraroena zera da, neska polit batek erantzuten duela. Baina gauzak ez dira batere errazak izango. Hitzordu bat adostu eta gero, Wilson konturatzen da neska hau benetan erotuta dagoela. Halere, berak ez dauka ezer hobeagorik egiteko. Beraz, gaua emango dute elkarrekin, eta ez da gau erraz bat izango.
Esan bezala, filmeak baditu Woody Allenen gauzatxoak -argazkigintzan erabilitako zuri beltz monokromatikoak Manhattan ekartzen du gogora- eta baita Richard Linklater eta Kevin Smithen ezaugarriak. Adibidez, bi pertsona hauen hitzordu motz eta gatazkatsua Before sunset edo Before sunrise (hau da, Antes del atardecer eta Antes del amanecer) filmeen eskema batzuk birziklatzen ditu, hori bai, umore gordin, sexuala eta dibertigarria alde batera utzi gabe. Ohiko zinema erromantikoa aspertzen bazaitu, saia zaitez In Search of a Midnight Kiss ikusten, ez zara damutuko, ez du betikoa kontatzen eta.