Datorren larunbatean, azaroaren 6an, Aiaraldea Euskal Herriko hamaika txokotako ikaslez beteko zaigu, hauek euren motxilak bizitzaz betetzeko asmoarekin Amurriora hurbilduko baitira bertan ospatuko den Ikasle Egunean parte hartzeko.
Ikasle Abertzaleak antolaturiko ospakizun honen edizio honetako ekintzak goizeko hamar terdietan hasiko dira parkean muntatuko den Hezkuntza Sistema Nazionalaren Aldeko gunean. Bertan, besteak beste, Kirikiño aisialdi taldearen laguntzarekin antolaturiko umeentzako tailerrez, Porrotx pailasoaren presentziaz, herri mugimenduen azoka herritarraz eta “beste unibertsitate eredu baten aldeko” olinpiaden finalez gozatu ahal izango dute bertaratutakoek. Hortaz gain, goiz osoan zehar hainbat txaranga, trikitilari eta abarrek osatutako kale animazioa egongo da herri osoan zehar.
Eguerdi partean, aldiz, 400 pertsonentzako herri bazkaria antolatuko da, arratsaldeko txanpari begira energiak berriztatzeko momentu ezinhobea bihurtuko delarik. Izan ere, ez dira gutxi egunaren bigarren zati honetarako erreserbatutako ekintzak.
Bost terdietan emango zaio hasiera udaletxeko plazatik abiatuta Manifestazio Nazionalari, “Ikasleoi erasorik ez! Hezkuntza Sistema Nazionala!” lemapean burutuko dena. Bukatzerakoan, ekitaldi politikoa egongo da.
Ondoren, bederatzietatik aurrera, gaueko ekintzei hasiera emango zaie, hauek aurrera eramateko bi karpa muntatuko direlarik. Karpa handian Doctor Deseo, Habeas Corpus, La Pulqueria, Gose eta Ze Esatek! taldeen kontzertuak ikusi ahal izango dira, karpa txikian jatekoa eta musika giro bikaina eskeiniko diren bitartean.
Seguraski, larunbat honek luzerako emango du Amurriora bertaratzen diren guztiontzat. Igandean, aldiz, nor bere txokora itzuliko da berriz, motxila apur bat beteago izanda noski.