Gizon bat eta bere pianoa; horretan datza, funtsean, Mara, Igor Arzuagaren proiektu berria. Baina deskribapen sinple horren atzetik musikari aretarrak abestu eta jotzean burutzen duen bidai sakonaren ibilbidea ageri da. Bidai horretan zehar, melankolia, tristura eta humorea modu harrigarri eta askotan ilun batean nahasten dituzten abestiekin topatu egiten da entzulea.
Igor Arzuaga ibilbide luzeko musikaria dugu. Hainbat taldetan jotzen ibili ostean, bakarlari moduan hainbat disko atera egin zituen eta, orain, bere ahotsa piano baten soinuarekin lagunduz, iluntasunaren eta argitasunaren elkarbizitzak sortutako kontrasteez zipriztinduriko bizitzako pasarteez hitz egitera datorkigu.
Bidai pertsonal horretan zehar Marari konpainia egin nahi dion orok horretarako aukera paregabea izango du datorren irailaren 16an arratsaldeko zortzietan Laudioko Kezka tabernan. Bertan Igorren (edo Mararen) abestiek josten duten bidezidorretik barrena ibiltzeko aukera izango dugu; errealitatea fikziotik, tristura pozetik eta bikaintasuna ridikulutik banatzen dituen bidetik alegia.