Apirilaren 27an, urtero lez, Prudentzio Deunaren jaiak ospatu dira Arabako hainbat lekutan eta Aiaraldeko Amurrio eta Laudio herriak ez dira salbuespena izan.
Bazkalosteko lehen orduetatik jende mordoa bildu da Amurrioko frontoian, Amurrioko Musika Eskolak Lucas Rey, Aresketa Ikastola eta Virgen Niñako ikasleekin batera antolatutako danborradaz gozatzeko prest.
Handik kilometro batzuk iparraldera, Laudion hain zuzen ere, sukaldariz eta danbor-jolez dotore jantziriko Laudio Ikastola, Lamuza, Latiorro eta La Milagrosako hainbat ikasle herriko plaza betetzen hasi dira bost eta erdietan hastekoa zen erretretetan eta danborradan parte hartzeko gogoz. Seiak hogei gutxiagotan hasi da 500 ume eta gazte inguruk koordinatutako danbor-orroa eta, egun honetako klasikoak diren hainbat piezei erritmoa jarri ostean, Basalarrina kalean barrena abiatu dira, kalejirari hasiera emanez. Zumalakarregi, Baias eta Nerbioi kaleetatik desfilatu ostean, lau ikastetxeetako partaideak Herriko Plazara itzularazi dute euren danborren soinua, kalejirari amaiera emanez. Festak, baina, aurrera egin du Basalarrinak antolatutako Tor magoaren ikuskizunarekin, txokolatadarekin eta Kirikiñok txikientzako antolatutako jolasekin.
Ordu batzuk geroago, zortzietan hain zuzen ere, 50 bat pertsonak Rakatapla Elkarteak antolatutako Erretreta eta Danborrada kalejirari ekin diote Kultur Etxetik abiatuta. Herriko hainbat kaletatik egun honetako errepertorio tradizional guztiari errepaso luze bat eman ostean, ekitaldiak Herriko Plazan amaitu dira gaueko hamarretan.