Urriaren 14an 0:00etan hasi zen Gopegin “Hiru Handiak” mendi lasterketa. Bi urtero behin antolatzen den proban 40 aiaraldear inguruk abiatu zuten bidea. Guztira 1475 lagunek hasi zuten bidea, baina arrazoi ezberdinengatik 959 izan ziren zeharkaldi osoa bukatu zutenak.
Lasterkariak animatzeko asko izan ziren Gopegiko irteera puntura, Landako urtegira eta Araiara hurbildu ziren aiaraldearrak. Gorbeian, esaterako, Arrastariarrek zintzarriekin itxaron zituzten frontalak piztuta zetozen mendizaleak. Oinez zein korrika, 100 kilometro eta 5000 metroko desnibela utzi zituzten atzean helmugaratzea lortu zutenek. Izan ere, zirkuituan zehar asko dira erretiratzen direnak arazo fisikoak medio.
Aiaraldeko sailkapena
Aiaraldea mailan helmugaratu zen lehena Ivan de la Cruz izan zen, 13 ordu eta 26 minutuko denborarekin; sailkapen orokorreko 26. postua, hain zuzen. Iker Arana Amurrio Traileko kidea izan zen eskualdeko bigarrena, 14 ordu eta 14 minutuko markarekin (53.postua). Hirugarren, berriz, Vicente Contreras sailkatu zen, 15 ordu eta 20 minutu erabilita. Bestalde, aipatzekoa da Amurrio Trail taldeko Mikel Letonak Portugaletik etxeratutako garaipena: 38 kilometro eta 2200 metroko desnibeldun proban beterano kategorian bigarren geratu baizen. Partaide guztien denbora markak www.manueliradier.com webgunean daude ikusgai.
Argazkiak: Jon Olabarria, Haizea Ginea, Amurrio Trail Taldea