Ostiralean, abenduaren 30ean aurkeztuko da Aiaraldea komunikabidearen webgune berria. 19:30ean izango da hitzordua behin-behineko bulego berrian, hau da, Laudioko Nerbioi kaleko 12 zenbakian.
Webgune eta APP berria
Webgune berriak orain arteko atal eta zerbitzuez gain berrikuntza ugari izango ditu. Besteak beste, irudi koorportatibo berria, webgunearen itxura eta antolaketa, iritzien atala, gida komertziala, zorion agurrak... Horrez gain, atariko azal orokorrean eskualdeko gairik esanguratsuenak bilduko ditu, baina herri bakoitzak bere atal edo txoko propioa izango du.
Formatuei dagokionez, argazki notiziak eta audio albisteak gehituko zaizkio informatzeko moduei, eta zuzeneko kontaketak egiteko programa berezi bat iznago du hedabideak hemendik aurrera. Zerbitzuen alorrean, berriz, zozketak, lehiaketak, porrak, hildakoak, zorion agurrak... egongo dira.
"Aiaraldea aldatzen ari gara"
"Aiaraldea aldatzen ari gara" lema izango du Aiaraldea Komunikazio Leihoko etapa berriak. Izan ere, hedabideaz gain, elkartearen izaera ere egokituko dute aurki: 2017an kooperatiba sortzera doaz. 2015-2020 arteko plangintza estrategikoari jarraiki, aurrera begira hauek dira jorratuko dituzten ildoak: euskara, komunitatea, feminismoa, komunikazioa, autoaskitasuna, berrikuntza eta garapena.