Olentzerok eta Maridomingik pertsonaia mitikologikoek hitzordua izango dute gaur eskualdeko hainbat umerekin. Hasteko, Orozkon egongo da Olentzero; goizeko 09:45ean eskolatik kalejira abiatuko dtu. Jarraian Amurriora joango da, Babiora, hain zuzen. Bertan argazkia egingo du 11:30ean.
Arratsaldean, Amurrion bertan hasiko du ibilbidea Ohitura elkartearen eskutik, Félix Murga kalean, alegia, Antzokitik eta Elexondo kaleetatik Goikolarra auzora arte. Opari banaketa, txokolatea, gaztainak, ikatza eta ardo beroa egongo da.
Haurrek ikazkinei gutunak, marrazkiak eman edota kalejiran parte hartuz gero, zenbaki bat jasoko dute, hainbat opariren zozketan parte hartzeko. Zozketa gune horretan izango da eta opariak Olentzerok emango ditu. Itzulera Mendiko kaletik Juan Urrutia plazara egingo dute.
17:00etan Luiaondon eta Orozkon izango dira agerpenak, Zubibarrin eta nagusien etxean. Okondora ere ordu horretan helduko da; ikazkinak Gorostiolatik La Ventillara joko du eta handik San Bartolome plazara.
Urduñan 17:30ean arituko dira Olentzero eta Maridomingi herrigunean Fita Fik, Getxa Goi eta Erauntsi Dantza Taldearekin batera Foru Plazan bukatzeko.
Ordu berean Arrankudiaga-Zollon ere agertuko dira. 17:30ean Garondon eta 18:00etan frontoian.
Azkenengo bi jarduerak Laudion eta Artziniegan egingo dituzte 18:15ean. Laudion La Milagrosa Ikastetxetik aterako dira herriko plazara heltzeko. Artziniegan, ordea, geltoki plaza izango dute abiapuntu