Atzo Artziniegan eztabaidatu zuten mozioa eta urtarrilaren 30ean gauza bera egingo dute Laudion, momentuz. Koalizioak gauzatu nahi du Eusko Legebiltzarrean onartutako 111/2013 Legez besteko Proposamena.
Koalizioaren aldarrikapena da Guardia Zibila, Polizia Nazionala eta Armada Euskal Herritik joatea. Gainera, proposamena da Ertzaintzak, Nafarroako Foru Poliziak eta Udaltzaingoak segurtasun eskumen osoak izatea. Horretarako, Eusko Jaurlaritzako Segurtasun Sailari eskatuko dio planifikazioa prestatzea eta egikaritzea.
Argudioak
EH Bilduk azaldu du: “Euskal Herria da Europako polizia eta indar armatu ratiorik altuena duen herria. Kalkuluen arabera, lurralde osoan 23.000 efektibo daude, 3.000.000 biztanle duen eremu batean. Europako erakundeek aholkatzen duten estatistiken arabera, 6.000 polizia efektibo izan beharko lukete. Honek, gainera, kostu ekonomiko izugarria du, 1.500 miloi euro ingurukoa urteko, zuzenean edo kupo moduan euskaldunok ordaintzen duguna”.
Artziniegan ez zen onartu mozioa
Atzoko Artziniegako udalbatzan eztabaidatu zuten testua, baina ez zuen aurrera egin. Alde batetik, EAJk ordezko mozioa aurkeztu zuen (nahiz eta horrek ere babes nahikoa ez lortu) eta aurkako boza eman zuen.
Bestetik, PPko zinegotziak “harrotasun osoz” eman zien babesa Guardia Zibilari, Ertzaintzari eta Espainiar Armadari eta mozioaren kontra bozkatu zuen.