Europar Batasunak iragarri du asmoa daukala Espainiar Gobernua zigortzeko araztu gabeko urak isurtzeagatik ibaietara. Iaz isuna izateko eskaera jaso zuen beste 17 herritan hori ez egiteagatik eta orain eskualdeko proiektuei eragiten die neurriak.
Izan ere, Nerbioigoineko hainbat udalerri itxaroten ari dira aspaldi Markinajako eta Basaurbeko araztegien eraikuntza. Antza, 2021 baino lehen ez dituzte egingo. Azpiegitura horiek ekidingo dute Amurriok, Laudiok edota Orozkok hondakin-urak zuzenean errekara isurtzea.
Artziniega eta Aiara
Hala ere, are larriagoa da Artziniega, Erretes Tudela eta Aiarako zenbait herriren egoera, euren kasuan ez baitago zehaztuta zein izango den proiektua. Hori dela medio, Artziniegako udal osoko bilkurak mozioa onartu zuen ostegunean Espainiar Gobernuak, URA Agentziak, Eusko Jaurlaritzak eta Arabako Foru Aldundiak adostu dezaten nola egin aurre arazoari.
Artziniegako Udalak uste du irtenbiderik egokiena dela Gueñeseko araztegiarekin egitea lotura. Iñigo Gomez de Untzueta alkatearen aburuz, “lan merkeena eta zentzudunena da, araztegi berria eraikiko balute Artziniegan, udalerriak hartu beharko luke bere gain mantenua eta hori garestia da”.