Euskal blogintzari buruzko inkesta publikoa plazaratu du Azkue Fundazioak. Azken urteetan alor horretan “ikerketa edo analisi sakonik” egin ez delako jarri dute abian egitasmoa. Helburua: “euskarazko blogen inguruko datu baliagarriak lortzea”. Euskarazko zenbat blog dauden, nola kudeatzen diren eta zein baliabide erabiltzen dituzten aztertuko dute, besteak beste.
Inkesta publikoa da eta ahalik eta herritar gehienek betetzea da asmoa. Horrela “ikuspegi erreal eta zabala” lortu nahi dute.
Hemen klikatuta bete daiteke galdetegia.
Fundaziotik adierazi dute ikerketaren bidez lortzen dituzten emaitzak publikoak izango direla. “Tresna baliagarria bihurtuko da inkesta egungo egoera ezagutu eta etorkizunera begira estrategiak, garapenak eta egitasmo berriak martxan jarri ahal izateko beharren inguruko datuak ezagutzeko”.
Blogetan! Lehiaketa ere martxan
Galdetegia ez da izango Azkue Fundazioak euskarazko blogen harira egingo duen ekimen bakarra. Abian dago jada Blogetan!, Azkuek Argia aldizkariarekin batera sortutako lehiaketa. Bigarren edizioa izango da aurtengoa, eta iazkoaren helburu bera izango du: “euskaraz sortzen diren blogak ezagutu, zabaldu eta sustatzea”.
Hemen klikatuta lortu daiteke lehiaketari buruzko informazio gehiago.