Euskal ohitura zaharra da Kanporamartxo ("Basaratusteak" bezala ere ezagutzen dena). Felix Mugurutza historialariak azaldu duenez, "Aratuste edo inauterietako aurreko igandean egiten da beti, mendi gune batean, leku zibilizatuetatik urrun. Jatorrian, basoari egiten zitzaion eskaintza zen, hura esnatzeko eta ernaltzeko, gizakion mesedean produzitu zezan geroztik". Mugurutzak adierazi du natura pizteko eta iratzartzeko neguko ohitura-multzoan (kandelerio, san blas, aratusteak, santa agata...) kokatu behar dela errito hori "bere dimentsio antropologiko zabalean ulertzeko".
Ingurutan ospatzen zen aspaldi (Arakaldon edo Orozkon) eta Arrankudiaga-Zollon oraindik ere antolatzen dute. Izan ere, igandean 10:30ean geratu dira herriko plazan. Eguraldiak lagunduko balu, Basakoetxera joko dute txitxiburduntzia egiteko. Euria eginez gero, ordea, paseoa motzagoa izango da eta Gizarte Etxean askalduko dute.
Orozkon Itxinape Mendi Taldeak antolatuko du txangoa.
Laudion, berriro
Laudion ohitura berreskuratu nahi dute eta Lezeaga inguruneko Sorginlarren izeneko tokian egiteko asmoa daukate. Santa Luziarako aldapak hasi baino lehen dago leku hori, Errekabietako ibilbidearen hasieran (seinaleak egongo dira), "Lezeagako sorginaren eta bertako lamin bihurrien bizilekuan". 11:30ak aldera elkartuko dira han.