Okondo eta Arrankudiaga-Zollo zeharkatuko ditu Gueñes eta Itsaso arteko goi-tentsioko lineak

Goi-tentsioko linea baten irudia. Argazkia: Oscar Anton

Hainbat udal eta kolektibo azaldu dira proiektuaren aurka. 2018an hasiko dira obrak.

Espainiako Gobernuak argitaratu berri du zein lur zeharkatuko dituen 400 kV-ko goi-tentsioko Gueñes-Itxaso lineak. Red Electrica de España enpresak eraikiko du azpiegitura hori eta EAEko 26 udalerritik igaroko da, tartean Aiaraldeko bitik. Lineak ia kilometro bateko (934 metroko) ibilbidea egingo du Okondotik eta Arrankudiaga-Zolloko lursail bat ere zeharkatuko du.

73 kilometro baino gehiago
73,467 kilometroko luzera izango du guztira lineak, Gueñesetik (Bizkaia) Itsasora (Gipuzkoa). 38.644.092 eurokoa da aurrekontua. Horietatik 511.804 baliatuko dira Okondoko zatia egiteko. Obrak datorren urtean hastea aurreikusia dago. Hilabete honen amaierara arte dago alegazioak aurkezteko aukera, Espainiako Gobernuak Gasteizen duen ordezkaritzan, Industria eta Energia sailean.

Hemen klikatuta ikusi daiteke zein lursailetatik igaroko den zehatz-mehatz.

“Izaera estrategikoa” duen proiektua
Espainiako Gobernuak adierazi du proiektuak balioko duela “izaera estrategikoa” duen 400 kV-ko ardatz bat amaitzeko, “Galizia eta EAE konektatzea ahalbidetuko duena”. Era berean, linea berriak eragingo du sistema elektrikoaren segurtasun, fidagarritasun eta kalitatearen handitzean, Espainiako Gobernuaren arabera.

Aurkako taldeak
Hala ere, hainbat talde azaldu dira proiektu horren aurka. Ekologistak martxan kolektiboak behin baino gehiagotan salatu du Galizia eta EAE arteko linearen eraikuntza, eta Gueñes-Itsaso zatiaren aurka ere azaldu dira hainbat herritar.

LAGUN AGURGARRIA:

Bisitatzen ari zaren web-gune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide