Gaur argitaratuko da Aiaraldea Egunkariaren 65. zenbakia. Hainbat gai jorratuko dira bertan, baina bat gailenduko da besteen gainetik: Martxoaren 8a.
Aiaraldeko mugimendu feministaren historiari buruzko erreportajea topatu ahalko du irakurleak egunkariaren erdiko orrietan. Herriz herrikako atalak, aldiz, berdintasunaren alde datozen egunetan egingo diren ekintzen berri jasoko du.
Beste artikulu bat egongo da Jendartea atalean, errefuxiatuen alde eskualdean egin diren ekimenei buruzkoa. Aiaraldeko Korrika Kulturala izango da nagusi Kultura atalean eta Kirolean Izaskun Bengoa txirrindulari ohiari eginiko elkarrizketa topatu ahalko du irakurleak.
Nekane Ibarretxe txakur hezitzailea, aldiz, kontrazaleko protagonista izango da. Umeengan euskara sustatzeko egiten duen tailerraz mintzatuko da.
Ohikoan bezala, hainbat kolaboratzailek parte hartu dute egunkariaren erredakzioan. Jone Unzaga, Anuntxi Arana, Esti Urresola eta Itziar Urquijo arduratu dira iritzi zutabeaz idazteaz eta Rubi, aldiz, komikia marrazteaz.