Gaur banatu dituzte sariak Laudioko Udaletxean eta hiru irabazleak herrikoak izan diren arren, parte hartzeko aukera izan dute baita Aiara, Okondo, Orozko, Urduña eta Artziniegako gazteek.
Hurrengoak izan dira testu sarituak, Zergatik zara heterosexuala? galderari erantzuten diotenak:
Iratxe L. P. 15 urte
"Jaiotzen garenetik izendatuak gara, etiketatuak, bide konkretu bat jarraitzera behartuak. Subjektu itsuak bihurtzen gaituzte, gizarteak esandakoak soilik entzuteko. Oso gazte garenetik helmuga berdinak ezartzen dizkigute eta hauek lortzeko ahalegintzen gara, ez baikara jakitun gizarteak esaten dituen gauzez gain beste hamaika aukera daudela.
Zergatik naiz heterosexuala? Egia esan, orain hamabost urte ditudala, konturatu naiz nire bizitzan zehar momentu konkretu batzuetan soilik izan naizela heterosexuala. Telebista ikusten nuenean, esate baterako, neska eta mutilez osatutako bikoteek zeukaten poztasun hori lortu nahian nire burua heterosexualtzat jotzen nuen. Irudietan beste bikote motarik ikusten ez nuenez, beste aukera horiek ez nituen ezagutzen.
Inoiz ez dut neure burua etiketatu, baina etiketatua sentitu izan naiz. Horregatik, heldutzen joan naizen bitartean nire buruari galderak egiten joan izan naiz. Zein pertsona mota ditut gustuko? Berain sexu edo generoa garrantzitsua al da? Orduan ondorio argi batera heldu nintzen, aske egin ninduena: pertsonak ditut gustuko eta ez gizartea".
Izar Mendiguren Cosgaya, 28 urte
"Zergatik? Nor? Zer? Nola?
Amaigabea da galderen zerrenda.
Zu bazara azkena,
Ziurrenik hori da problema:
kanpokoari kasu egitea barrenari ordez.
Demagun, arrosa edo urdina beharrean morea hautatzen duzula,
mugen tokian aukerak ikusten dituzula.
Ez al litzake ederra?
Zebrabide txuribeltzak sexu aniztasunaren ortzadar bihurtu diren garaiotan
“pisuzko” galdera batek heldu nau kolpez:
“Zergatik zara heterosexuala?”
Eta zu? Zergatik zaude itsu?
Noiz arte egongo zara maitasun ereduekiko gor?
Ez geratu mutu:
aske maitatu, aske bizi.
Tximeletak ez dira sabelean
sentitzeko jaio,
hegan egiteko baizik".
Diana Ibargutxi Abarrategi, 34 urte
"Galdera honi erantzuten badiot, suposatzen da neure burua heterosexualtzat hartzen dudala? Zer da heterosexuala izatea, ba? Badago etiketa jartzerik, desira eta erakarpen jolasean? Zertarako? “Irekitze prozesuak” moralaren ikuspegitik deitzen ditugun horiek mila kutxa eta etiketa dituzte barnean, baina, ez al da hori ere guztiz mugatua? Kutxa eta etiketa ezberdinak “onartzea”ri buruz hitz egiten dugu, hori bada, ba, intolerantzia! Aniztasuna ez da helburua, abiapuntua baizik! Hori da sexudun egiten gaituena, eta guztiak gara sexudunak, giza-ezaugarria baita. Iraganean, kutxa onartu bakarra, gero bi, gero hiru, baina beti kutxak, beti gure orden mentala eta moralari so. Gure seme-alabak, auzokideak, jendea orokorrean heterosexuala izango dela uste dugu, eta hori ez den guztia aniztasuna dela pentsatzen dugu, aniztasuna besteen kontua dela sentituz, baina danok gara anitz, danon ezaugarria da aniztasuna. Sexualitatea bizitza osoan zehar eraikitzen dugu, gure biografian oinarrituta. Pertsona ezberdinak desiratzen ditugu, edota keinu ezberdinak, usainak, hitz egiteko erak, begiradak, bestearen ukipena trenean. Ez al da oso pobrea hori dana kutxa batean sartzea horretan oinarrituz etiketa bat sortzeko? Egon gaitezen munduan erne, argi eta modu erotikoan desiratzen duguna bizitzeko!"