Irailarekin batera amaitu da Aiaraldea Gaur hedabidearen “Udariklik” postal lehiaketa. Txemi Llano argazkilari aiararrak, Txani Llano idazle laudioarrak eta Lucia Menoyo Aiaraldea hedabideko kolaboratzaileak osatu dute epaimahaia. Guztira, 162 lan aurkeztu dira. Marrazkien kategorian ez du inork alerik bidali; eta, beraz, banatu gabe geratu da Artelan papertegiko margo maleta.
Iraide Vallejo arespalditzarrarena izan da Aiaraldeko irudirik politena, adituen aburuz. Hortaz, bi lagunentzat dastatze menua edukiko du Maroñoko Guzurtegi jatetxean. Lanik umoretsuenagatik, berriz, 4 lagunentzat abentura ekintzaz gozatzeko parada izango du Joseba Vivanco artziniegarrak. Bidaien kategorian Zuriñe Alava Kosterarra gailendu da, eta bi lagunentzat menu berezia dastatuko du Ondarruko Arrigorri ostatuan. Ikus-entzunezkoen alorrean, ordea, Alex Colladoren timelapsea nagusitu da. Ondorioz, bi pertsonarentzat egonaldia eta gosaria ditu zain Arcos de Quejanan.
“Publikoaren saria” izan da aurtengo nobedadeetako bat. Webgunearen bitartez, hiru postalik kuttunenak hautatzeko parada izan dute erabiltzaileek astebetez. Gauzak hala, Arene Barañanok etxeratuko du eskualdeko produktuen poltsa. Irudi guztiak www.aiaraldea.eus atarian daude ikusgai.
Bosgarren edizioa bukatu arren, egitasmoak egokitu eta dinamika berriak sortzen jarraituko du hedabideak; sorkuntza lanak, parte hartzea eta euskararen erabilera sustatzeko helburuarekin.
ARGAZKI GUZTIAK:
BIDAIA: ZURIÑE ALAVA
“HATORTXU ROCK 20...ZENBAT SENTIMENDU, ZENBAT ELKARTASUN” . Udan musika kontzertuak ikusteko asko bidaiatu du Zuriñe Alavak. Besteak beste, Lakuntzan izan zen Hatortxu Rocak jaialdian. “Jendearen elkartasuna nahi nuen ateratzea argazkian. Udarekin oso lotuta daude kontzertuak”, adierazi du.
AIARALDEA: IRAIDE VALLEJO
“ZINTZILIK EGOTEKO ZABUAK” . Etxaurreneko ermitan ezkontza baterako jarri zuten kolunpioa du ardatz Iraide Vallejoren lanak: “Mendira joan nintzen eta arreta deitu zidan. Egun bateko kontua izan zen, biharamunean kendu egin zuten zabua”.
UMOREA: JOSEBA VIVANCO
“AZERIA OILATEGIA ZAINTZEN” . Oportoko merkatuan atera zuen argazkia Joseba Vivancok: “Merkatu zaharra ikustera joan ginen, oso antzinakoa baita. Arrain guztia kanpoan zuten, eta katuak grazia egin zigun. Pasatzen ginen guztiok atera genion egoerari argazkia”.
GIFAK: ALEX COLLADO
Udako egun berotsuan igerilekuetara joan ordez, Laudion geratzea erabaki zuten Alex Collado eta bere lagunek: “Zuhaitz baten itzalean pipak jatea bururatu zitzaigun. Lurrean eserita nengoela, hainbeste inurri batetik bestera lasterka ikusterakoan, “time lapsea “ egitea otu zitzaidan”, kontatu du.