Udazkenarekin batera hasi da mendi ibilaldien denboraldia. Aiarako Kexaako eta Laudioko Latiorro jaietako zeharkaldiek abiatu zuten ekitaldien segida. Irailaren bukaeran heldu zioten erronkari Arrankudiaga-Zolloko Matxinkorta eta Okondoko Ganekogorta mendi taldeek ere. Hain zuzen, igandean izan zen Okondo Ibarra V. ibilaldi neurtua.
Orozkok hartuko dio Okondori lekukoa bihar -urriak 8-, iraupen mendi ibilaldia prestatu baitute hogeita bederatzigarrenez. Izenak adierazi gisa, iraupen eta distantzia luzekoa izango da martxa: 7:30ean aterako dira partaideak herriko plazatik. Ohi bezala, Itxinape elkarteak antolatuko du jarduera, eta aurreratu dutenez, ezinbestekoa izango da aurrez izena-ematea. Internet bidez egongo da horretarako aukera, www.itxinape.com webgunean.
Elkarteko bazkideek 3 euro ordaindu beharko dituzte, eta gainontzekoek 5€. Orotara hiru zirkuitu proposatu dituzte: handia, ertaina eta txikia. Egun berean -urriaren 8an- egingo du Txarlazo Mendi Taldeak ere “Urduñako XIV. Mendi Martxa”. Zailtasunaren arabera, bi plano aurkeztu dituzte. Batetik, “A” bidea, 26.2 kilometroduna. Antolatzaileek zehaztu dutenez, La Paul, Arando, Nerbioiko ur-jauzia eta Artomaña zeharkatuko ditu bideak. “B” ibilbideak, berriz, 14 kilometro izango ditu, eta La Paul, Tortotela eta Delika igaroko ditu, besteak beste. Ordutegiari dagokionez, 8:00etan aterako da lehendabizikoa, eta 10:00etan bigarrena. Nabarmentzekoa da elkarteak ibilbidea berritzeko urtero egiten duen ahalegina. “Dutxatzeko aukera ere eskainiko dugu”, erantsi dute.
Gorobel martxa
Amurrioko Mendiko Lagunak taldeak ere aurkeztu du dagoeneko udazkeneko hitzordua: azaroaren 5ean egingo dute XXXI. Gorobel martxa. Urriaren 25ean zabalduko dute apuntatzeko epea www.mendikolagunak.eus atarian. Mendizale gehien pilatzen dituen ekimena da Amurriokoa, urtero ehunka lagun elkartzen baititu. Zeharkaldiaren nondik norakoak geroago plazaratuko dituzte.
Laudioko eta Artziniegako zitak beranduago izango dira; azaroaren amaieran eta martxoan, hurrenez hurren. Mendi maratoien alorrean, azaroaren 12an estreinatuko da Urduña.
Zabala da, beraz, Aiaraldean mendizaletasunaz gozatzeko eskaintza. Horren adibide dira herrietako mendi taldeak, gaur-gaurkoz 7 baitaude: Matxinkorta (Arrankudiaga-Zollo), Ganekogorta (Okondo), Itxinape (Orozko), Goikogane (Laudio), Txarlazo (Urduña), Mendiko Lagunak (Amurrio) eta Ganzorrotz (Artziniega).
Bestalde, gazteei bideratutako hainbat programa edo eskola ere badaude. “Oxigenoa euskarari” dinamikak, esaterako, Laudioko nerabeekin gauzatzen ditu mendi irteerak. Amurrioko Mendiko Lagunakek ere bidean du mendi eskola. Horrez gain, gazteentzako irteera bereziak eskaintzen ditu urtean zehar, ingurune eta lagun berriak ezagutzeko asteburu-pasak.
Aiaraldea Gaur hedabideak “kirol aisia” jorratuko du hemendik aurrera ere bai. Hala, Aiaraldean txangoak egiteko proposamenak argitaratuko ditu komunikabideak, adin guztiei bideratutako kirol planekin eta jardueraz gozatzeko jakin beharreko xehetasun guztiekin.