Bukatutzat eman du aurtengo indusketa kanpaina San Pedro mendiko lubakietan bertan lanean jardun duen EHUko ikerlari taldeak. 2016an ekin zioten Guda Zibileko aztarnak bilatu eta ikertzeari. Iazko arrakastaren aurrean aurten kanpainari berriz ekitea erabaki zuten. Behin kanpaina bukatuta behin-behineko ondorioak kaleratu dituzte txostenean.
1936. eta 1937. urte bitartean gudu zelai izan zen Amurrio eta Urduña artean kokatzen den San Pedro mendia. Ugariak dira Guda Zibilak bertako magaletan utzitako arrastoak: bonben kraterrak, suntsitutako egiturak...
Aurtengo lanak
EHUko ikerlari taldeak iaz abiatutako lanari ekin dio aurtengo kanpainan. Egitura guztien erregistro topografikoa egin eta bi-lubaki lerro eta hiru gotorleku induskatu dituzte. Horrekin batera San Pedro mendian dagoen izen bereko baselizaren hondakinak garbitu dituzte.
Ikerlariek ez dute bakarrik lan egin, ordea. Hainbat garbiketa eta indusketa lan auzolanean burutu dituzte Lezama, Amurrio, Urduña, Arrastaria eta Urkabustaitzeko auzokideekin batera. Horrenbestez, maiatzean, jardunaldi irekiak antolatu zituzten indusketa lanetara Aztarna elkartearekin eta Lubakikoak elkartearekin batera.
EHUko laborategian
Aurtengo kanpainan aurkitutako material arkeologikoa EHUko laborategietan ikertua izaten ari da egun. Denetariko aztarnak topatu dituzte San Pedroko lubakietan, esaterako munizioa (500 bala zorro induskatu dituzte aurten, iaz 200 izan ziren) edota errestaurazio lanetan dauden egunkari zatiak. Aipatzekoa da Josu Santamarinak zuzendutako taldeak ez duela giza-aztarnarik topatu inguruan. Behin-betiko ondorioen txostena ateratzearekin batera amaitutzat emango dituzte indusketak oraingoz.