Duela lau urte sortu zen Errigora ekimena Nafarroa Hegoaldean. Bi afera nagusiri erantzun nahian sortu zen ekimena: Nafarroa Hegoaldeko euskararen egoerari heldu eta bultzada emateko alde batetik, eta bestetik, Erriberako nekazaritzaren gainbeheraren aurrean alternatiba berri bat sortzeko.
Izan ere, Euskal Herrian Erriberako nekazarien produktuz hornitutako saskien salmentarekin ateratako diruaren %25 Nafarroa Hegoaldeko euskalgintza sustatzera bideratzen du Errigora ekimenak.
Ekarpen ekonomiko horrekin inguruko ikastolak, hezkuntza publikoko D ereduko matrikulazio kanpainak edota euskaltegiak lagundu eta indartu ditu egitasmoak. Aurtengo lehenengo kanpaina urriaren 24an abiatu zuten, “Nafar Hegoaldeko uzta euskarari puzka” lemapean. Aurten Nafarroako nekazarien produktuz betetako 6.000 kutxa baino gehiago prestatuko dituzte. Errigoraren filosofiari jarraiki, hiru lan egun antolatuko dituzte nekazari eta ekoizleen produktuak bildu eta kutxetan sartzeko. Azaroaren 14an bukatuko dute kanpaina.
Aiaraldean ere bere ibilbidea jorratu du Errigorak. Azken lau urteetako garapena oso positibotzat jo dute dinamika honen eskualdeko sustatzaileek. Urterik urtera harrera hobea jasotzen ari dira. Egun, saski eskaerari erantzuteko azpiegitura eta laguntzaile sarea hedatu beharrean daude. Hurrengo erronka jarri diote euren buruei: Errigora ekimena indartzea eta espazio berrietara zabaltzea. Aiaraldea Kooperatiba Elkartea aktiboki arituko da kanpainan, besteak beste. Aiaraldean 200 saski banatzera heldu ziren iaz. Aurten zifra hori bikoiztu nahi dute, guztira 400 saski banatuaz. Ekimenaren berri emateko karpa jarriko dute Amurrioko Juan de Urrutia plazan datorren igandean, Gorobel Mendi Ibilaldia aprobetxatuz.
Saskiak internetez zein eskuz eskatu daitezke. Eskuz eskatzeko zerrendak eskualdeko hainbat txokotan jarriko dituzte eskuragarri:
