Abenduko zubian ireki ziren elur kiroletako azpiegitura gehienak Espainian eta Frantzian. Amurrioko Elur taldeak ez zuen aukera galdu, txangoa antolatu baitzuen iragan astean frantziar PirinIotara eta.
Bi astero egiten dituzte ibilaldiak. Facebooken eta www.elurtaldea.com webgunean zabaltzen dute ekintzen berri. Nagusiki Frantziako Piriniotara jotzen dute, aitortu dutenez, arrazoi bikoitzagatik: “Gertutasunagatik eta kalitate-prezio eskaintzagatik”. Edozelan ere, Baqueirara birritan joatera zaletu dira partaideak. “Alpeetara irteera bat egiten dugu behintzat; izan Frantziara, Italiara, Austriara edo Suitzara”.
Bazkideei begira prestatzen dituzte txangoak, baina beso zabal hartzen dituzte gainontzeko eskizaleak ere: “Hasiera-hasieratik izan da gure helburuetako bat zaletasuna sortzea, eta horretarako ez dago irakastea baino bide hoberik. Bidaia bakoitzean gutako batek pare bat orduko klaseak ematen dizkie hasiberriei”. Hori dela eta, harro diote askoren irakasle izan direla.
Aiaraldeko elur aukerak
Aiaraldean gune ofizialik ez egon arren, asko dira eskualdeko mendietan barrena elurraz gozatzera atera diren kirolariak, baita elurrarekin praktika litezkeen kirol modalitateak ere. Gualdetxu MBT taldekoak, esaterako, Peña Negrara joan ziren Urduñatik zuriz jantzitako lurretan mendi bizikletan aritzera.
Oinezkoen artean ere ugari izan dira Txarlazo aldera jo duten herritarrak. Edota, Orozko ingurutik Gorbeia edo Oderiagara igota, gailurretik eskiekin irrist egitea erabaki dutenak. Aaron Garmendia da horietako bat. “Gallarraga eta Ganekogortako maldak ere onak dira, baina zaila izaten da elur dezenterekin topatzea”, adierazi du. Haren iritziz, Gorbeia da onena “jaitsiera on bat egiteko”.