Bilatzaile berria du atzotik Aiaraldea Gaur hedabideak. Internet tresnen garapenari esker bisitariek errazago topatuko dituzte euren intereseko edukiak. Ordena, eremua, webguneak eta epeak zehazteko parada eskainiko du programak. Izan ere, Tokikomen baitan, Elhuyarrekin garatu du atala komunikabideak.
Aukera berriak
Funtzio berriak eskainiko ditu garapenak. Hurrenkerari dagokionean, berritasun edota antzekotasuna izango dira aukeratzeko aldagaiak. "Edukiak argitalpen dataren arabera erakutsiko ditu bilatzaileak, hala eskatuz gero. Bilatzeko kontzeptuaren antzekotasuna ere identifikatuko du programak", zehaztu du Izar Mendiguren Cosgaya zuzendariak.
Eremuaren alorrean, erabiltzaileak markatuko du bilatutako hitza izenburuan, sinaduran, sarreran edota testuan aurkitu nahi duen. Ildo beretik, dokumentu mota iragaziko da: hitzordua, artikulua, argazki galeria, bideoa, audio edota gida komertziala.
Halaber, epe tarte batean argitaratu diren edukiak filtratzeko modua egongo da; "hau da, noiztik nora plazaratutako edukiak begiratu nahi diren zehaztekoa". Gainera, Aiaraldea hedabideko ekoizpenaz gain, Tokikomeko -tokiko hedabideetako- webguneetan argitaratu dituzten edukien emaitzak eskainiko ditu bilatzaileak.