Ikasle greba deitu du biharko Ikasle Abertzaleak antolakundeak. Laudio izango da ardatza eskualdean, goiz osoko egitaraua prestatu baitute Aiaraldeko Ikasle Abertzaleak taldeko kideek.
9:00etan jarri dute lehen hitzordua, Lamuza plazan. Gaztetxera joango dira gero, hainbat eztabaida egingo baitituzte bertan 10:30etatik aurrera. “Eguneroko borroka lokalak -ikasgela baten beharra, etxeko lanak...- landuko ditugu”, aurreratu dute antolatzaileek. Problematika horiei “nola erantzun” aztertuko dute.
Euren ustez, gaur egungo hezkuntza ez dago “langile klasearen interesetara” bideratua. Horregatik, “indarrak batzeko” tresnatzat dute greba, “gaur egungo hezkuntza gainditzeari begira”.
Aurrera begira
Aurrera begira ere hainbat borroka aktibatzeko asmoa dutela adierazi dute Aiaraldeko ikasle abertzaleek. “Errebalidak eta borroka lokalak izango dira gure lan ildo nagusiak”, jakinarazi dute, “espero dugu grebak bultzada ematea kurtso bukaerari heltzeko. Gogoak ditugu errebalidei erantzuteko hainbat borroka pizteko”.
