YouTube plataforman kanala atondu du Aiaraldea hedabideak. Aurrerantzean bertara igoko ditu ekoizten dituen bideoak. Hainbat atal eta erreprodukzio-zerrenda izango ditu, xede-talde eta gaien arabera sailkatuta.
Orain arte Vimeo baliatu dute Aiaraldea.eus atariko bideoak igotzeko. Plataforma horretako kontua irekita mantenduko du hedabideak, 2011tik 2017ra bitartean ekoitzitako bideoekin.
Hedabideak aurten ikus-entzunezkoen alorrean gauzatu nahi dituen erronkei erantzuteko sortu dute kanala. "Telefono mugikorretatik edota sare sozialetatik Youtube kontsumitzeko joeraren aurrean, beharrezkoa da komunikazio tresna, bideo-estilo eta espazio berrietara jauzi egitea”, azaldu du Izar Mendiguren Cosgayak. Komunikabidearen zuzendariak aurreratu du “salto nabarmena” emateko asmoa dutela aurten bideogintzan, formatu berriak probatuaz eta jada ekoizten diren horien kalitate eta interesgarritasuna handituaz.
"Hilero bideo berezi bat"
"Hilero bideo-proiekzio ezberdin bat ekoizteko apustua handia bada ere, erronkari heldu nahi diogu. Martxoan Aceroseko dokumentala emititu genuen atarian zuzenean, eta apirilean eskualdeko 'Pauso doinuak' ikuskizuna ardatz duen saioa sareratuko dugu", erantsi du arduradunak. Zentzu horretan, eskualdeko jaietako jarraipena berrikuntzaz betea etorriko dela kontatu du: "Telebista programak egitea dugu buruan, bideo formatu ezberdinak esperimentatzea. Horrez gain, zuzeneko emisioak eskaintzeko martxan ditugu buruak eta tresneria ere".