Gaur eguerdian eta arratsaldean zeharkatuko du Euskal Herriko Itzuliak Aiaraldea. 14:15ak aldera sartuko da eskualdera Arrankudiaga-Zollotik. Laudio, Amurrio eta Urduñatik igaroko da gero, eta Barrerilla igoko du, Goiuri eta Izarra aldera joateko jarraian.
Hirugarren etapa izango da gaurkoa, itzuliko luzeena. 184,8 kilometroko ibilbidea egin beharko dute txirrindulariek, Bermeotik Gaubeara. Lasterketaren antolatzaileek aurreratu dute bidea “uste baino gogorragoa” izango dela: “Bermeoko 35 metroko mailatik, Uribarri Gaubeako 546 metroko mailara, txirrindulariek gora egingo dute ibilbide guztian zehar”. Aurreikusi dutenez, “ihesaldi goiztiarrak” egon daitezke mendiko maillota lehiatzeko. “Txirrindulariek etapa honetan egin behar izango duten ahalegina hurrengo jardunaldiko erlojupekoan nabari daiteke”.
Julian Alaphilippe lehena
Julian Alaphilippe txirrindulari frantziarra da lehen sailkatua momentuz eta, Primoz Roglic eslobeniarra zortzi segundo eskasera du. Lehen eta bigarren postuan geratu dira -hurrenez hurren- itzuliko lehen bi etapetan.
Hala ere, sailkapena asko aldatu daiteke lau etapa falta baitira oraindik.