Aiaraldeko lasterkariek inguruko eta urrutiko probetara jotzeko ohitura dute eta martxoa horren isla izan da.
Berez, Aiaramendi taldeko Oiane del Vallek asfaltoko oinetakoak jantzi eta Azkoitia-Azpeitia lasterketako ibilbide motzean parte hartu zuen martxoaren 24an. 8 kilometroak 31 minutu eta 31 segundotan bete ostean, hirugarren postua bereganatu zuen sailkapen orokorrean.
Kirol hitzordu horretan eskualdeko hainbat lagun egon ziren maratoian zein ibilbide motzean; Amurrio Trailekoak, Orkatzakoak eta Laudio Atletismokoak, besteak beste.
2. postua beteranoen artean Valentzian
Javi Ibañez Orkatzak taldeko kideak Vilanova de Castellóra bidaiatu zuen martxoaren 25ean Cursa de la Muntayna Font Amarga-Les Salines lasterketan lehiatzeko. Beteranoen kategorian 2. postua erdietsi zuen eta podiumera igo zen.
Horrez gain, eskualdeko hainbat taldeetako kideek izena eman zuten Trail Cabo de Ajoren III. edizioan. Sailkapen onena Aritz Estebanena izan zen, 6. postua hartu baitzuen.
Gainera, Bediako Mendi Egunean 24 kilometroko lasterketa antolatu zuten eta Joseba Urbano Aiaramendiko kirolariak 5. postua bereganatu zuen ibilbidea betetzeko 2 ordu, 21 minutu eta 50 segundo baliatu ondoren. Xabier Abasolo taldekidea 29. izan zen.
3. sailkatua Lleidan
Iñigo Carvalho Aiaramendi taldeko kirolariak 3. postua eskuratu zuen Volta Peremola lasterketan, Lleidan, pasa den larunbatean. Sailkapen orokorrean 7. izan zen. 22 kilometroko ibilbidea bete zuen 2 ordu eta 20 minututan.