Aiaraldeko, Zuiako eta Nerbioiko udalek trantsizio energetikoaren alde eginiko lana aitortu du Energiaren Euskal Erakundeak. Gaur goizean egin dute udal ordezkariei bereizgarriak banatzeko ekitaldia Amurrioko Refor industriagunean.
Ibilaldi txiki bat egin dute hori baino lehen Nerbioiko parke linealean barrena. Josune Irabienek aukera probestu du Amurrioko Udalak energia berriztagarrien eta efizientzia energetikoaren alorretan garatzen ari den proiektuak azaltzeko. Alkateak jakinarazi duenez, sektore pribatuarekin elkarlanean hasi dira. Maskuribaiko industriaguneko bederatzi enpresen monitorizazio energetikoa gauzatu dute, hainbat proposamenez hornitutako txostena osatu eta planteatzen diren neurriak herriko gainontzeko enpresetara estrapolatzeko.
16 udalerrik hartu dute parte ekitaldian, Aiaralde bederatziak barne. Hauek dira, herriz-herri, Energiaren Euskal Erakundeak nabarmendu dituen proiektuak:
- Amurrio: “Alkateen itunari” atxikitako udalerria, argiteria publikoa, eraikinak (klimatizazioa eta barne-argiztapena), bi ibilgailu elektriko eta bi bizikleta elektriko udal-flotarako, eta energia berriztagarrien sustapena. Eguzki-panel termikoak eta fotovoltaikoak ditu hainbat eraikinetan.
- Arakaldo: argiteria publikoa eta energia berriztagarrien sustapena: biomasa-instalazioa udaletxean.
- Arrankudiaga: argiteria publikoa, eraikinak (barne-argiztapena) eta energia berriztagarrien sustapena.
- Artziniega: argiteria publikoa, eraikinak (inguratzailea) eta energia berriztagarrien sustapena.
- Aiara: argiteria publikoa eta energia berriztagarrien sustapena.
- Laudio: “Itunerantz zuzenduz” itunari atxikitako udalerria, argiteria publikoa, eraikinak (klimatizazioa, inguratzailea eta barne-argiztapena) eta energia berriztagarrien sustapena.
- Okondo: argiteria publikoa eta energia berriztagarrien sustapena.
- Orozko: argiteria publikoa eta energia berriztagarrien sustapena. Biomasa eta gas naturala baliatzen dituen District Heatting proiektu bat sustatu du etxebizitzei zerbitzua emateko.
- Urduña: argiteria publikoa eta energia berriztagarrien sustapena.