aiaraldea.eus

Aiaraldearrek ezin izan dute "Ehunmila" proba bukatu, goizaldean eten baitute ekaitzagatik

Erabiltzailearen aurpegia Izar Mendiguren Cosgaya   Kirola  Aiaraldea

"Ehun mila" maila altuko kirol proba jokatu dute bart. Aiaraldear ugarik hartu dute parte ekimenaren bi probetan, ekaitzagatik ordu txikitan bertan behera utzi duten arte.

Aiaraldearrek ezin izan dute "Ehunmila" proba bukatu, goizaldean eten baitute ekaitzagatik
Amurrio Traileko kideak, proba hasi aurretik. / Amurrio Trail | Ikusi handiago | Argazki originala

Eguraldia izan zen atzokoan oztopo nagusi kirolarientzat, baita antolakuntza lanetakoentzat ere. Beasain (Gipuzkoa) izan zuten abiapuntu "Ehunmilak" lasterketara apuntatu zirenak. Horien artean zeuden, besteak beste, Amurrio Traileko zazpi lagun. 18:00etan abiatu ziren kirolariak lasterka. Goizaldeko ordu txikitan jakinarazi dutenez, ekaitzagatik bertan behera utzi du antolakuntzak lasterketa oro. Antolatzaileen hitzetan, "ezinbestekoa zen lasterketa suspenditzea", eguraldi baldintzengatik. 

Probarik gogor eta ezagunena
Euskal Herri mailako probarik gogor eta ezagunena da "Ehunmila". Ultratraila helburu zutenek, 160 kilometroko bidea zuten aurretik. Azken urteetan, baina, "G2haundiak" Goierri Traila ere bateratu dute Ehunmila proba entzutetsuarekin; 88 kilometroko zirkuitua, hain zuzen. Lasterketa luzeenean 435 lagunek hartu zuten parte, eta "G2haundiak" ekimenean 426k.

Aizaro Marañon Amurrio Traileko kidearen esanetan, penaz erretiratu ziren partaideak. Izan ere, prestaketa luzea egin dute proban aritzeko. Amurrioko taldea, ordea, ez zen izan eskualdeko ordezkari bakarra; Goimazpe, Gualdetxu eta Orkatzak taldeko bat edo beste apuntatu baitzen erronka potolora. 

Erantzunak

Erabiltzailearen aurpegia Ziortzau Erantzuna | #1

Aiaraldeko Goimazpe kirol taldetik ere partaide batzuk egon ziren.

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa