aiaraldea.eus

Udako kanpaina berezia egingo dute eskualdean, odol-emaileak lortzeko

Erabiltzailearen aurpegia Txabi Alvarado Bañares   Jendartea  Aiaraldea

Odola emateko bost zita egongo dira horretarako abuztuan; bi Amurrion eta bana Artziniega, Okondo eta Laudion. 

Udako kanpaina berezia egingo dute eskualdean, odol-emaileak lortzeko
Unitate mugikorrarekin bertaratuko dira eskualdeko herrietara. / Aiaraldea.eus | Ikusi handiago | Argazki originala

Udako kapaina berezia jarri du abian Arabako Odol Elkarteak, odol-emaileen kopurua handitzeari begira. Elkarteko kideek adierazi dutenez, opor garaian erdira jaisten da odol donazioen kopurua, odol beharra berdina izaten jarraitzen duen bitartean. “Guretzat, urtero-urtero, abuztua oso hilabete zaila izaten da. Izan ere, egunean Euskadin 400 odol donazio behar dira eta uda partean ez da erraza izaten kopuru horietara iristea”, azaldu dute elkarteko kideek. Nabarmendu dutenez, odolak “oso iraungitze data laburra” du. Plaketek 5 egun irauten dute, globulu gorriek 45 egun eta plasmak 2 urte. Hori dela eta, azpimarratu dute oso garrantzitsua dela opor-garaian ere odol emaileak egotea.

Bost zita eskualdean
Bost aldiz bisitatuko du elkarteak eskualdea, unitate mugikorrarekin. Astelehen honetan -abuztuak 6- Amurrioko Osasun Zentroan egongo dira, 16:30etatik 20:00etara. Ostiralean berriz bisitatuko dute herria, 9:45etatik 13:00etara udaletxearen aurrean. Asteazkenean -abuztuak 8-, aldiz, Artziniegako frontoiaren alboan egongo dira, 17:00etatik 20:00etara. Okondo hilaren 20an bisitatuko dute; 17:00etatik 20:00etara egongo dira osasun zentroaren parean.

Laudion, aldiz, sanrokeak baliatuko dituzte odol-emaileak erakartzeko. Baserritar Egunean -abuztuak 24- egongo dira herrian, 9:45etatik 13:00etara Aldai Plazan.

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa