Sagar Egunaren bigarren edizioa egingo dute datorren asteburuan Laudion. Felix Mugurutzak ibilaldi didaktikoa eskainiko du larunbatean -urriak 20- 10:30ean Aldai plazatik abiatuta.
“Gardeako bide zaharretatik ibiliko gara. Bertatik igarotzen ziren merkatariak antzina, eta baserritarren sagardoa hartzen zuten Bilbora eramateko”, azaldu du ikerlariak.
Edari horrek herri-kulturan “pisu handia” izan duela nabarmendu du Mugurutzak. “Laudiori buruzko lehen erreferentzia dokumentatua X. mendekoa da, bertan jada aipatu egiten dira sagarrondoak. Elizak, baina, edari madarikatutzat zuen. Horregatik, ez du isla handirik izan dokumentuetan, gustu txarreko zerbait zela uste zelako. XVI. mendera arte oso zabaldua egon zen edari hori eskualdean, baina ordutik aurrera ardoa nagusitu zen”.
Igandean, egun osoko egitaraua
Sagarrak eta sagardoak Laudion eta Aiaraldean utzitako ondarea berreskuratzea da, hain zuzen, Sagar Egunaren xedea. Iaz ospatu zen lehenbiziko aldiz, arrakasta nabarmenarekin:
Ekimena urtero errepikatzea da antolatzaileen hasierako asmoa. Igandean -urriak 21- egingo dira ekintza gehienak, Aldai plazan. Haurrentzako jokoak, sagar garrafa dastatzea, azoka, sagarra mozteko erronka, eta beste hainbat jarduera egongo dira 10:00etatik 17:00etara.
EGITARAU OSOA
10:00 // Jaiaren hasiera: tokiko eta baserriko produktuen azoka. Sagardoa ekoizteko tresnen erakusketa. Sagar zukua dastatzeko aukera
11:30 // Haur jokoak
12:00 // Etxeko sagar tarten txapelketa
12:30 // Sagarra mozteko erronka bikoteka (688892944edo sagareguna@gmail.com)
13:00 // Sagar garrafa dastatzea
13:30 // Sari banaketak
15:00 // Azoka bukaera
17:00 // Solasaldia udal erabilera anitzeko aretoan