Bizilagunak ekimenaren aurtengo edizioak badu data zehaztuta: azaroaren 11n -igandea- egingo da. Araba osoan izango da ekimena, “zurrumurru xenofoborik gabeko kulturen arteko elkarbizitzaren alde”.
Jatorri ezberdinetako bizilagunak mahai beraren bueltan bazkaltzea da ekimenaren funtsa. “Asko gara kultura ezberdinetako pertsonak ezagutzeko gogoak ditugunok, baina askotan, aukerak topatzea zaila egiten zaigu”, adierazi dute antolatzaileek.
Errefuxiatuei Laguntzeko Espainiako Batzordearen EAEko taldeak (CEAR-Euskadi) antolatu du egitasmoa, Arabako Foru Aldundiarekin batera. Parte hartzeko 688 812 944 telefono-zenbakira whatsapp mezu bat bidali baino ez da egin behar.
Harrera geroz eta hobeagoa Aiaraldean
Iaz 180 aiaraldearrek hartu zuten parte ekimenean: 106 Laudion, 55 Amurrion eta 19 Artziniega eta Okondon. Geroz eta harrera hobeagoa du ekimenak eskualdean, urte bat lehenago 94 pertsonek hartu baitzuten parte egitasmoan, 11 etxetan banatuta.
Hainbat jatorriko bizilagunak egon dira Aiaraldean egin diren bazkarietan: Argelia, Argentina, Bolivia, Euskal Herria, Maroko, Pakistan, Paraguai, Portugal, Sahara Ekialdea eta Senegalekoak, besteak beste.
Araba osoan iaz 1.000 pertsonak baino gehiagok hartu zuten parte egitasmoan, 93 etxe edo txokotan bilduta.
